Sunday Sun Ah Karen PDF Pawlin Ralkap 40 An That

Tuisun May 23 sunday sun ah Karenni People’s Defense Force (PDF) pawlin an ramsung ih um thuneihnak latu ralkap 40 hrawng an kap that. Sunday zinglam ah ralkap in mipi um men an kap ciamco ih pahnih hliam an tuar ih inn ṭhenkhat khal an siatsuah.

Curuangah Karenni People’s Defense Force (PDF) pawl cu an um men thei nawn lo ih sun hrawngah Moe Bye khua sungih ralkap/palik pawl cu an va kap ciamco ih ralkap 15 an kap that ih 4 an kai.

Hliamtuar bese zetzet khal an um ih an sakhan khal an urkang sak, ralkap pawl ih meithal le ralthuam tam zet an laksak. Moe Bye khua sungih an doawknak ah PDF lam tlangval kum 27 mi a thi ih 5 in hliam an tuar.

Mipi hriamkai pakhat in “Ralkap pawlin khuasung mipi pawl an hmuhsuam tuk ruangah kan um men thei nawn lo ih kan kap. Mino tam zetin daiten lamzawhnak ruangah in kai ih in that ding aiin thih le thih tin kan do sawn ve ding. Martyrs kan tuar sawn ding an ti” tin Irrawaddy thuthang hnenah a sim.

Loikaw-Demoso lamzin ah ralkap pawl an rak bawh ih an doaw ciamco sal, zanlam ih an kahawknak ah ralkap lam 24 an thi bet.

Tu’ah Loikaw lamzin kiangkap hrawng ah an um lai, hmun dang ih um ralkap pawl khal Loikaw lam pan in an poksuak ti theih a si. Doawknak nasa zet a thleng vivo thei. March thla ihsin Chinram, Sagaing, Magwe le Mandalay mipi pawlin ralkap pawl an rak do rero zo, tu’ah Karen mipi pawl khalin an do ve thlang.

Be the first to comment

Leave a Reply

Your email address will not be published.


*