Sunlaifang Ah Sibawi Nupa Cu Kah That An Si, A Phen Ah Thuanthu Rapthlak Zet Aum

May 28, 2021 sunlaifang ah India, Bharatpur ih sibawi nupa cu kah that an si. Lamzin ih an tlan lai cu mi pahnih in an rak dingter, an motor cu bike in an rak kham ih an lu ah vei-5 hrawng an kap ih motor sungah an thi cih.

An cangvaihdan cu CCTV in arak zuk ngah thluh ih pakhat cu a hmai a tuam ih pakhat sawn cu a tuamaw lo, tualthattu pahnih cu zo an si ti an theifiang zo ih kai dingin an hawl rero lai. Sibawi nupa ih hmin cu Sudeep Gupta le Seema Gupta an si, mi pahnih in an thatnak a san cu phuba laknak a si.

2019 kum ah nunau fakhat nei zo Deepa Gurjar timi cu Dr. Sudip sikhan ah hnaṭuan in aum, Deepa Gurjar cu sikhan ih hmin cazin ngantu a si ih fapa kum 5 mi anei zo, sibawi thawn an rak kopaw thup ṭheu tin thawmvang aum.

Dr. Sudip ih nupi in a rinhlel ruangah Deepa cu a hnaṭuannak ihsin a ban, asinan Dr. Sudip in a nupi thei loin amai inn apartment ah an nufa in a umter. Cun, khuasung ah hnaṭuannak spa le beauty parlor khal a tuahsak, cutin caan an hmang vivo hnuah Dr. Sudip ih nupi in a theisuak.

A pasal ih nu thawn Deepa tei inn ah an va feh ih thilumdan pawl cu an sutfiah, sibawi ih nupi le a nu cu an thinheng tuk ih Deepa tei nufa cu an that.

Thil alh thei chemical in an tawih ih an nufa in an kang that, tualthattu sibawi Seema Gupta le a pasal ih nu cu palik pawlin an kai hngal. Cun, Dr. Sudip khal an kai thotho. Asinan, awlaiten an suak theisal ih May 28 sun ah kah that an si, sibawi nupa kap thattu pahnih cu an rak thatmi Deepa ih ṭapa le a cousin an si. (Ref: Indiatimes)

Be the first to comment

Leave a Reply

Your email address will not be published.


*