Surkhua RC Siangbawi le Pastor An Kaihnak Thuhla Cipciar

July 26, 2021 ah Surkhua RC Father Rev. Noel Hrang Tin Thang le amah thawn khualtlawng tlang Dumva khuami saya Clement Cung Hnin cu lamzin ah CDF-Hakha pawlin an rak kai. Ralkap thawn an pehtlaihaw ih Hakha ah ralkap pawl va tong dingin an feh tin an rak kai.

Cumi hnuah Surkhua Myo ih Siat Ni Ṭhat Ni le Covid-19 Kilhimnak committee in RC Father Rev. Noel Hrang Tin Thang cu an committee aiawh ih an thlah mi a si thu le Hakha ah siivai la dingin an cah ruangah va la dingin an feh thu pawl an tarlang.

Cun, mipi humhimnak hrangah ralkap pawl a tong thu khal an tarlang cih. RC aiawh in Bishop Hre Kung khalin a seherh thu le thlahsal dingin theihternak ca a suah. Cumi hnuah CDF pawlin thilumdan cu August 1, 2021 sun ah an run tarlang.

“Hakha ihsin Surkhua ah rawngbawltu Catholic Siangbawi Rev. Fr. Noel Hrang Tin Thang le a thluntu RC Saya Clement Cung Hnin (Dumva khuami) cu ralhrang ralkap thawn naihniamten hna an ṭuantlang, pehtlaihnak an nei lawng siloin ralkap pawl ih bawmnak la dingin Hakha ah an feh ruangah July 26, 2021 ah kan kai” tin an tarlang.

Catholic Siangbawi Rev. Fr. Noel Hrang Tin Thang in ralkap pawl arak pehtlaih ṭheu ruangah CDF in July 6 le July 15 sun ah veihnih ralrinnak an rak pe zo nan ziangah a siar lo ruangah July 26 ah an kai. CDF-Hakha thuhla cu diklo zetin messenger in a kuatsuak ti pawl an thei.

CDF in “Biaknak lam ruangih kan kaimi asilo, ralkap cozah thawn an pehtlaihawk ruangah kan kai. Curuangah biaknak lamin rak buai hlah uh, inn pakhat ah ei le in thawn kan ret lai. CDF-Hakha in tuihnu ih a thlun dingin capi kan ngan ih Hakha le Surkhua Catholic upa pahnih in theihpinak hmin an khen asilen kan suah zalen hngal ding” tin an tarlang.

Be the first to comment

Leave a Reply

Your email address will not be published.


*