Suu Kyi Fapa In, “Hnakum Na Suahcam Ahcun Hmaiton In Birthday Duhsaknak Pawl Na Cohlang Thei Ding Ti Ka Besei” A Ti

Myanmar ralkap pawl ih an kaihmi Aung San Suu Kyi cu June 19 ah kum 76 a kim thlang ding. June 16 sunah Norway ram, Suu Kyi Park sungah hlunghlai zetin a suahcam lawmnak puai cu advance in an rak tuahsak.

Cutawk ah a fapa Htein Lin (Dannian Kim Arundel Aris) in a nui hrang le Myanmar mipi pawl a dinpinak thu ca in a kuat.

Dannian Kim Arundel Aris in “Ahmaisabik ah, tuisun advance suahcam lawmnak tawlreltu nan zaten parah ka lungawi tuk. Ka nu, Myanmar ramsung buainak lakah suahcam duhsaknak ṭhabik ka lo hlan.

Kei le ka innsungsang cu democracy kimcang zet ih ngah dingin zuam rero tu Myanmar mipi pawl hnenah kan um. Leitlun mipi pawl Myanmar ramin democracy an ṭul tuk, Myanmar mipi pawl bawm in dinpi vivo hram uh.

Hnakum tuvek caan ahcun ka nu in a suahcam duhsaknak pawl cu hmaiton in a cohlang thei ding ti ka beisei, hnakum tuvek caan Myanmar mipi G.Z pawl khal zalennak nan ngah ding ti ka beisei” tin a tarlang.

Be the first to comment

Leave a Reply

Your email address will not be published.


*