Suu Kyi In Bulpak Inn Le Lo Anei Nawn Lo, Miharsa Pawl Bawmnak Ah A Hlu Thluh

Myanmar ram thuron petu kum 75 mi Aung San Suu Kyi cu thuneihnak latu ralkap pawlin thubuai phunphun orhter in an kai. Tu’ah a umnak khal theih a si nawn lo, UK le US ih um a fapa le an sungkhat pawlin UK Foreign Office fehtlang in an pehtlaih tum rero lai nan an hlawhtling thei lo.

Ralkap pawlin an thubuai orhter mi pakhat cu mipi sumpai thawhkhawm mi a ei ru ti a si. Suu Kyi in 2012 kum ah a nui hmin sirhsan in mibawmnak pawlkom ‘Daw Khin Kyi Foundation‘ arak sersuak. Ralkap in cumi pawlkom sungih sumpai cu a duh dandan in a hmangsuak ṭheu tin an hek.

Suu Kyi thuhla buaipitu U Moe Zaw Oo in “Aung San Suu Kyi in amai bulpak inn le lo anei nawn lo. Yangon, Inya Lake tipikap ih an inn le Mandalay, Poppa Mountain cu miharsa pawl bawmnak hrangah arak hlu zo. Tu ih aumnak Naypyitaw inn cu cozah inn a si.

A neihmi sumpai zaten miharsa pawl bawmnak hrangah arak hlu thluh ih ‘himi hi ka inn a si tin ko ding khal anei lo. Cuvek minung cu misual tin thubuai an orhter thei cu ka theithiam lo…” a ti.

Ralkap in “Daw Aung San Suu Kyi in mipi sumpai thawhkhawm mi 1.6 billion kyats hmangin Naypyitaw, Horticulture Vocational School ah inn ropi zet a sak lai. Daw Khin Kyi Foundation arak sersuahnak ih a tumtahmi khal a si” an ti.

U Moe Zaw Oo in “A neihmi inn le lo zaten arak hlu thluh zo ruangah foundation chairperson ih umnak dingah tin kan tawlrel sak mi a si. A pension hnuah umnak ding inn nei lo tluk a si ih hnangamten aum theinak dingah kan ti, Daw Aung San Suu Kyi a thih hnuah aumnak cu museum ah kan tuah tum.

A cabu duhmi le a ro thilri khawlkhawm mi pawl khal kan ret thluh zo, mi tampi in amai bulpak hmang dingah sumpai, sui le ngun tampi an rak hlu zo. Cumi pawl khal foundation sungah a hlu thluh, thungai ti ahcun amai ta ding a si. Ralkap in mipi sumpai a eiru tin thubuai an tuahsak cu a hminthanak ding sawn a si” a ti.

Ralkap in mipi sumpai a eiru tin thubuai an tuahsak ruangah Aung San Suu Kyi ih pekawknak pawl cu mipi in an theih phah sawn.

Be the first to comment

Leave a Reply

Your email address will not be published.


*