Sweden Ram Ah An Inn Ih Mikhual Cu Rawl An Do (Pe) Dah Lo

“Mikhual cu zoh ṭha ding, rawl thawthaw suangsak ding, Thlasuah conak” tin khuahlan kan pilepu pawlin in rak cah ta. Asinan, Sweden nunphung le daan ahcun mikhual hi rawl an do dah lo. Rawldawr tivek ah anmahten an va ei ṭheu.

Mipa pakhat in Sweden ram ih a thilton danglam zet cu online parah a pholang ih midang khalin an rak tong ve zo thu comment-nak ah an ngan. Cangantu in, “Sweden ram ah, ka tlawngkaipi ka rualpi tei inn ah ka va thleng. Zanriah an ei zik ih a nu in a ko, ka rualpa in ‘room sungah nangmahten rak um lawk aw. Ka ra kaiso lohli ding’ in ti.

An inn ah ka um ve ti an thei ko nan an innnsang ih rawleinak ah in sawm lo. Rawlei an lo sawm lo ahcun na ei ngam ding maw si?” tin a tarlang. An nunphung le daan danglam zet ruangah a si.

Online mi pakhat in, “Kei khal Sweden ram ah ka va tlawng ih rualpi inn ah ka riak. Zing kan tho ih ka rualpi in ‘rak um lawk aw, innhnuai ah ka va tum lawk ding’ in ti. Minute 15 hnu hrawngah step ihsin ka vun bih cu an innsang in thaithawh an rak ei rero lai. In hmu ih ka rualpi in ‘kan khop zik te. In rak hngak lawk aw’ in ti cu ka mangbang tuk” a ti.

Pakhat khalin, “Sweden ram ah veikhat mikhual ka rak si ve zo. An innsung, coka sung khal lut an siang lo. Mileng khan sungah in toter ringring, an innsang in zanriah an ei khawm. Veikhat lawng ka rualpi in in ra zoh ih a lutsal” a ti. Ṭhenkhat in Sweden ram lawng asilo, Denmark, Finland, Iceland le Norway ram khalah an mikhual pawl rawl an pe dah lo’ an ti.

Be the first to comment

Leave a Reply

Your email address will not be published.


*