Tachileik Ah Ralkap Uknak Duhtu Pawl Duhphorhnak An Tuah Laiah Bomb A Puak Ih Mithi Le Hliamtuar An Tam

Shan State, Tachileik khawpi ah ralkap uknak duhtu pawlin January 31 le February 1, 2022 sun ah ralhrang uknak an duh tin hlunghlai zetin puai an tuah. A veihnih puai an tuah sun February 1 ah bomb a puak ih a sun ah mi 2 an thi, hliamtuar hi 40 hrawng an um ih tuisun February 2 ah hliamtuar pakhat a thi bet. Hliamtuar lakah bese zetzet khal an um.

Tualsung mi pakhat in, “Ralkap uk duhnak puai ah minung 700 lenglo an um, puai an tuah rero laiah bomb in an deng puak ih a hmun ah mi 2 an thi. Hliamtuar hi 40 hrawng cu an um ding” a ti. Bomb puak lo mi 2 khal an hmu ih į¹­uanvo neitu pawlin an thianfai zo.

CCTV an zoh hnuah bomb puahtu ih an rinhlelmi Wa miphun tlangval kum 24 mi Eisan Min cu ralhrang pawlin an kai ih nasa zetin an hrem ciamco hnuah thusutnak hmunpi ah an hruai. Himi bomb puaknak thuhla ruangah mino 10 lenglo an kai zo.

Kiangkap um pakhat in, “An puainak hmun kiangkap hrawngah uniform hruh lo ralhrang meithal keng tam zet an um. Bomb puak ruangih hliamtuar aiin ralhrang pawlin meithal an kap ciamco ruangah hliamtuar an tam sawn ding. Bomb puak hnuah meithal an kap ciamco ih hliamtuar pawl cu bomb puak ruangih hliamtuar tin thuthang an suah” a ti.

Be the first to comment

Leave a Reply

Your email address will not be published.


*