Tachileik Ah An Kaihmi Mino Pakhat Cu Hridai Thawn Thlai That Dingin A Thu An Ṭhencat

Shan State, Tachileik, Waing Kyauk vengsung ih um tlangval kum 24 mi Ain Sai Mein cu ralhrang pawlin an kai ih a thih hlanlo hridai thawn thlai dingin Tachileik District Court in a thu a ṭhencat. February 1, 2022 ah ralhrang uk kumkhat kimnak cu ralhrang le an lamtang pawlin an lawm.

Ralhrang dinpinak puaipi an tuah ih cutawk ah bomb a puak, bomb a puak veten ralhrang pawlin an duhduhnak hmun ah meithal an kap ciamco ih mi 4 an thi ih mi 34 in hliamhman nasa zet an tuar. Himi bomb puahtu cu ‘Wa’ miphun Ain Sai Mein a si tin an kai ih an vel ciamco.

Tualsung mino pakaht kum 21 mi Htet Lin Aung khal bomb puahtu ih rinhlel in an kai ih kum 7 sung thawngtla dingin a thu an ṭhencat. Khuami pakhat in, “Ain Sai Mein cu phuangaw dingin ralhrang pawlin an vuakvel ciamco. A thi zik te, a thaw khal a sam zo.

Ralbawi pawlin nan vaw that ngaingai ding cawl lawk uh, a ziaum deuh hnuah nan vaw sal ding an ti. Ralhrang pawlin an vaw ciamco ih an cawl, cutin a khattawk ah an vaw sal ṭheu” a ti. An thlai that ding ni le caan cu an phuang hrih lo.

Be the first to comment

Leave a Reply

Your email address will not be published.


*