Taliban Pawl An Huk Dumdo, An Ramsung Ih Um Christian Pawlin “Thlacamnak Ah In Rak Mang Ringring Uh” An Ti

Kum 20 hnuah Taliban pawl cu Afghanistan ramsung ah an huk dumdo ih leitlun cu a thiar culco. US le Nato ralkap pawlin kum 20 sung an rak umchilh zo, sanhnih sungah Afghanistan ramsung ah US ralkap 2,300 zat an thi ih 20,000 lenglo in hliam nazet an tuar (Sankhat cu kum 10 in an siar).

Presidents Obama le Donald Trump lal lai ihsin Afghanistan ramsung ih umhmun khuar an ralkap pawl cu ko tlung dingin an rak relcia zo. April 2021 ah President Biden in “Afghanistan ramsung ih um US ralkap pawl cu a kosal ih September 11, 2021 ah an zaten innlam tlung thluh dingin thu a suah.

Taliban pawlin hnaihnoktu an nei nawn lo ding ruangah an lungawi zet ih Afghanistan cozah cu do ciamco ṭul loin an la thei. Taliban hi daan le dun hngetkhot zet an nei ih an daan le dun thlun lo pawl cu an that hluahhlo.

An rak lal lai ih an daan le dun tuahmi pawl cu ‘an ramsung ah TV um lo ding, music le cinema khal an siang lo. Cun, nunau nauhak kum 10 hnuailam cu tlawngkai an siang lo, nunau pawl an vaksuak ding asilen an korsaupi Burqa an hruh tengteng dingih an sungkhat mipa in a thlun ding tipawl a si. Sinak bangaw tivek le nunau hlothlau cu an ti cimit hluahhlo.

An ralkap pawl ih nupi dingah tleirawl tete cu an kai ṭheu ih an sakhua ah an lutter. Tuiṭum ah Taliban pawl an lalsal ruangah an ramsung ih um Christian pawl cu thlaphang in an um, Taliban pawl an lal hlan khalah Christian pawl cu hmuhsuam, hremnak a phunphun an rak tuar rero zo ih Taliban pawl an lal cun an tuar nasa sinsin ding.

Paul Robinson in “Nan thlacamnak ah Afghanistan ramsung ih um Christian pawl in rak mang ringring uh. Thimkhuazing a tlung nan kan rawngbawlnak cu hnangamnak, nunnak le beiseinak a si” a ti.

Dr. Jim Denison khalin “Afghanistan mipi pawl an him theinak dingah thlacam uh. Taliban pawl hrang khalah thlacam uh, an visions & an mang lam in siseh, thilmak pakhat khat ihsin Jesuh an zum theinak dingah thlacam uh” a ti.

Be the first to comment

Leave a Reply

Your email address will not be published.


*