Taliban Pawl Phen Ah China Le Russia An Um

Afghanistan ramsung buainak cu tulai ah a lar zet, an president khal ramdang ah a tlan zo. Zarhpisun ah Taliban hriamkai pawlin an khawpi Kabul ih an president office ah umhmun an va khuar thei.

Afghanistan mipi pawl khal Taliban pawl ṭih ah an ram an suahsan tum ih airport ah an buai vutvo, airport ih an buai tuk ruangah security in minung 5 hrawng an kap that. Cun, minung 2 cu vanzam an rak vawk man nan vanduai thlak zetin an tla that.

US ralkap pawlin kum 20 lenglo an rak umchilh zo hnuah an tlungsal cu Taliban hriamkai pawl khal an ra langsal ve. Afghanistan ram cu official in Taliban pawlin an la tin an phuang hrih lo nan hmuntinkim ah Taliban pawl an umkhat thluh zo.

Afghanistan ralkap hlun pakhat in “Kan ram ka suahsan lohli a ṭul, ralkap ṭuan zo ka si ruangah Taliban pawlin in bat ding” a ti. Taliban pawl cun “Zohman tuahmawh an tum lo thu le phuba lak an tum lo thu an phuang ve ih daiten an kuthnuai ih um dingin thu an phuang.

Hitin an buainak ah ramdang pawlin an milesa cu an ko tlung thluh ih Afghanistan ramsung ih um an embassy khal an khar. Asinan, China le Russia cu an khar ve lo ih Taliban hruaitu pawl thawn an tongaw thu theih a si. Taliban pawl an cangvai nasa hlanah an palai in China le Russia upa pawl ava tong zo ih ziangthu an rel ti cu theihfiang a si lo.

China foreign ministry Hua Chunying cun “Innhnen aw, rualpi ṭha an sinak thuhla le Afghan mipi pawl ih duhhrilnak cu kan upat a si” a ti. Russia thuphuangtu Nikolai Bordyuzha khalin “Central Asia ramsung ah daihnak kan duh asilen Taliban pawl kan biak a ṭul” a ti.

Be the first to comment

Leave a Reply

Your email address will not be published.


*