Tamu Ah An Kapaw Nasa

Sagaing, Tamu ramsung ah thuneihnak latu ralkap le PDF Tamu pawl an kapaw ciamco ih ralkap lam 17 an thi, mipi lamah pakhat a thi ih pahnih in hliam an tuar.

Tamu khualeng Technical University ah ralkap pawl umhmun an khuar, August 23 zinglam nazi 5:00 ah PDF Tamu pawlin an va kap. PDF ṭuanvo neitu in “Zinglam nazi 9:00 hrawng tiang kan kapaw ih ralkap lam mithi an tam zet. Tamu siizung ah ralkap uico pawl an tlanlut ciamco” a ti.

Zinglam ih kahawknak a thleng ruangah tuisun cu Tamu khuasung a thing reprep ih mivaksuak zohman an um lo. August 22 sun khalah mipi kilhimtu pawlin Tamu, NanPhalong (နန်းဖာလုံ) tlawnginn ih umhmun khuar ralkap pawl cu bomb in an va puah ih ralkap pahnih an thi, hliamtuar khal tam zet an um.

Mipi kilhimtu PDF Tamu cu NUG kuthnuai ih cangvai PDF pawlkom an si ih leiram parih ralkap pawl cu an cimit hlanlo a phunphun in an do vivo ding tin thu an suah. Tamu khua cu Myanmar ramsung ah ralkap pawl do hmaisabik khua pakhat ah a telve.

Be the first to comment

Leave a Reply

Your email address will not be published.


*