Tamu Ah Chin Mino (2) Thattu Cu Theih A Si

Tamu peng, Myothit khua kiang lamzin kap ah Chinmi (2) ih ruak cu April 24 zinglam ah kiangkap um pawlin an hmu. Kuki Chin miphun an si. Kyunpinthar (Teiyang) khuami kum 20 le kum 25 mi an si ih, an hmin cu Suan Min Thang le Thang Ku Kim an si.

April 23 sun ah Thone Kyaw khua ah bawlung an va sit ih zanlam ah an rualpa ih mopuai lawm dingin Fai Lin khua ah an feh. Fai Lin khua thlen hlan Myothit khua kiangah an rak that. An ruak cu lamzin kiang kait 50 hrawngah an hmu, an ruak kiangah cerek hawng 5 aum.

An lu, dunglam zang le hnakruh ah vuakvelhnak hliamhma aum. Mithi ruak cu siizung motor in an phur ih April 24 sun ah an khua ah an tlunpi. Hmin tarlang remlo tualsung mi pakhat in, “Kate (Meitei) Tapung pawlin an that, hitawk ah Meitei tapung pawl an um tamtuk.

Ralhrang in ramsung thuneihnak an lak hnuah Meitei tapung pawl cu Tamu khuasung ah an ra tlangleng ciamco” a ti. May 11 le July 22, 2021 kum ah Meitei tapung pawl le ralhrang pawl an tangtlang ih tualsung mipi ralkap Tamu-PDF pawl thawn an kapaw a ti. Meitei tapung pawl cu India cozah dotu hriamkai an si ih Myanmar ramri ah umhmun an khuar.

Be the first to comment

Leave a Reply

Your email address will not be published.


*