Tamu Ah Damiah Taih An Tong, A Thaizing Ei Ding Khal An Nei Nawn Lo

Tamu, India-Myanmar ramri ih um innsang hnih cu August 28, 2022 zan nazi 9:00 hrawngah hriamkai pawlin damiah an taih. Hriamkai pawl cu minung 7 an si ih namtong, pistol le tuahcop meithal pawl an keng. Innsung ih um upa pawl cu kut an thlak ciamco ih au thei lo dingin an tuah.

Nauhak pahnih le kum upa khal meithal in an tin, damiah taih tong innsang pahnih cu Gurkhas miphun an si. Tualsung mi pakhat in, “Innhnen aw an si. Bike 3, an sui le ngun, phone 4, sumpai ting 20 lenglo, fangfai, cii, siti le an thilri bungrua zaten an laksak thluh.

A thaizing ei ding khal an nei nawn lo. Nauhak kum 2 mi le kum 5 mi cu tutiang ṭih thlaphang in an um rero lai. Minung an hmu asilen an ṭih tuk, zohman an hmu ngam nawn lo” a ti. Suamhmang pawlin neta ah kan ra sal ding, ting 150 rak ralring cia uh’ tin an hringhro.

Palik sakhan ah thubuai an va thehlut nan palik pawlin ṭuanvo an la ngam lo, ramsung a him lo tuk tin zianghman an buaipi thei lo ding thu an rak sim thei. An veng sungah nitinten Pyusawhti le ralhrang pawl an feh ṭheu ih tualsung mipi pawlin PDF-Tamu ih cangvaihnak cu a si lo’ an ti. Tamu ramsung ah Gurkhas miphun le Chin miphun pawl cu hmuhsuam, hringhronak an tong ṭheu ruangah khua dangdang ah an tlan.