Tamu Ah Fimthiamnak Zung A Kang

Tamu, Saopha ahmat (7) vengsung ih um Tamu ramkulh fimthiamnak zung cu tuisun June 4, 2022 sun nazi 3:00 hrawngah a kang.

Tualsung mi pakhat in, “Kangmei a suahnak san cu kan thei hrih lo. An urkang maw, meisa hri fehsual ruangih kang ti kan thei lo. Nazi 1:00 sung hrawng a kang ih zung pakhat cu a kangral thluh zik te” a ti.

Tamu ramkulh fimthiamnak ṭuanvo neitu U Tot Kyi cu ralhrang in ramsung thuneihnak an lak hnuah ṭuanvo pek mi a si. A fapa cu ralhrang lamtang ralbawi a si.

Tulai Tamu ramsung ah ralhrang lamtang Pyu Saw Htee pawl an cangvai nasa zet, kan dung May 31 khalah Pyu Saw Htee pawlin tualsung mi pakhat an kap that.

Thudang: Chin State Ah Tlawngkai Dingih Hmin Pe 22,000 An Um
Chin State ah nauhak tlawngkai dingih hmin pe 22,000 an um thu Chin ramkulh fimthiamnak ṭuanvo neitu in a phuang ih Paletwa ramsung ah hmin pe an tambik a ti. June 2 ah Myanmar rampum huap nauhak tlawnginn pawl an ong thlang ding. May 31 tiangah Chin State, peng 7 sungah tlawngkai dingih hmin pe 22,000 an um.

Chin ramkulh fimthiamnak ṭuanvo neitu in, “Mani tiangah Chin ramsung ah nauhak tlawngkai dingih hmin petu 22,000 hrawng an um zo. Tlawng cu thaisun ihsin kan ong thok ding, Paletwa ramsung ah tlawngkai dingih hmin pe an tambik. Tuikum fimthiam zirnak khal thla 9 sung a si ding. Zirhtu saya/sayama pawl an daihaw lo asilen a remdan in kan tawlrel ding” a ti.

June 1 sun ah Nay Pyi Daw ah ralhrang pawl an tonaw khawm ih ramsung ih tlawngta nauhak hmin ap mal bik State cu Chin State a si tin Zaw Min Tun in a phuang. 2022-2023 kum sung Chin State fimthiam zirnak ah Thantlang le Kanpetlet siar lo peng (7) Hakha peng, Falam peng, Tedim peng, Tonzang peng, Paletwa peng, Mindat peng le Matupi peng ah nauhak tlawnginn an ong ding.