Chin State, Tedim ah ramtawihnak ihsin tlunlam mi pahnih cu ralhrang pawlin an kai ih an that. Kum 29 mi Pau Za Mang le kum 21 mi Pau Suan Thang cu Saizang khuami an si ih sungkhat naiaw te an si.
An rualpi mi 13 thawn May 16, 2022 ah Tonzang, Mualpi khua kiang lamah ramtawi dingin an poksuak. Bike 7 thawn an phuraw ih lai meithal an keng. May 21 simlam nazi 3:00 hrawngah an tlung ih Tedim khua, Scott lamzin ah Pau Za Mang le Pau Suan Thang cu ralhrang pawlin an kai.
Khuami pakhat in, “Scott lamzin ah rawldawr ihsin tlunlam ralhrang pawl thawn an tongaw ih an kai. An hmai ih feh pawl cu an luat, an kaihmi pahnih in lai meithal an keng. An hruaimi uico pahnih khal ralhrang pawlin muka in an khuh ih an hruai cih” a ti.
An ramtawihpi mi 13 pawlin an rualpi pahnih cu inn an thleng lo ruangah an ngaihveng, an hmeltheih ralbawi pakhat an zingzoiter ih Tedim, tatkhon ih ralhrang pawlin an kaih thu an thei. An va suthlam ih ralhrang pawlin Kalaymyo lamah an kuat tum thu an rak sim, anmah thawn an tongaw thei lo.
An va sut rero hnuah an that zo thu an sim thei. Ralhrang pawlin an ruak cu an pe duh lo. May 23 le May 24 ah ruak um loin Lai daan in vuinak caanserh an hmang. Ralhrang thuthang Fifty Two News ah an kaihmi pahnih cu CNF tin an rak tarlang.
Leave a Reply