Thailand Ih Hnaṭuan Kawlram Mi 1,180 In Covid-19 An Ngah, Inn Luah Man, Ei Le In Ah Buainak An Tong

Thailand, Tak Province ih factory hnaṭuan Kawlram mi 1,180 in Covid-19 an kai thu theih a si. Thailand cozah in an hnaṭuannak factory sungah quarantine in a khum top ih zianghman a ngaihsak lo ruangah an buai zet.

June 28 ah Thailand cozah in “Myanmar mi hnaṭuantu pawl hnenah alakin siivai kan pe lo ding” tin arak phuang zo. Thailand ih Myanmar pawlkom hotu Ma Thuzar in “Thailand ramsung ih um Kawlram mi damlo pawlin bawmtu an nei lo, anmai sumpai in siivai an lei a ṭul. Siizung le siikhan feh len an hrangah a awl lo” a ti.

An inn luah man le ei le in lam khalah harsatnak an tong thu theih a si, an hnaṭuannak company lam khalin zianghman an ngaihsak lo. Zangnadamnak tivek an pek lo ruangah ṭhenkhat hnaṭuantu pawlin an hnaṭuannak company cu taza an cuai.

Thailand-Myanmar ramri Mae Sot khua ah curfew thu an phuang ih ramdang mi hnaṭuan pawl hrangah zan nazi 8:00 ihsin zinglam nazi 4:00 tiang vahsuah an siang lo. Thailand mi pawl hrangah zan nazi 11:00 ihsin zinglam nazi 4:00 tiang an curfew.

Thailand khawpi Bangkok, Nonthaburi, Phang Nga, Samut Prakan le Samut Songkhram ih hnaṭuan Kawlram mi pawl khalin Covid-19 an kai celcel ti a si. Thailand ramah Covid-19 nat kai thar 9,300 zat an um ih zarhte sun lawngah mithi 91 an um.

Be the first to comment

Leave a Reply

Your email address will not be published.


*