Thailand Ah Motor A Let Ih Kawlram Mi (4) An Thi, 9 In Hliam Nazet An Tuar

August 28, 2022 zingpit ah Kawlram mi pawl phurtu motor cu lamzin kap ih um tikuang ah a tla ih a let. Daan lo ih Thailand ramsung lut an si ih ca poimawh zianghman an nei lo.

Thailand mibawmtu pawlkom in an va bawm ih motor sung ihsin mithi ruak 4 an thiarsuak. Mipa 3 le nunau 1 an thi ih hliamtuar 9 an um. Motor an cansual hnu reilote ah motor pakhat ava thleng cih ih minung 2 a phursuak hnuah cakpin an tlanliam lai kiangkap ih um pawlin an hmu.

Motor dang thawn tlansuak pahnih cu motor mawng le daan lo ih Kawlram mi 13 phurtu an si ding ti an zum ih an hawl rero lai. Mithi ruak 4 le hliamtuar pawl cu a naibik siizung ah an phur ih an tuamhlawm rero lai.

Thailand ramsung ah Kawlram mi pawl phurtu motor cansualnak thuhla hi theih ding a tam zet, motor mawngtu pawlin lamzin kiltu palik pawl an ṭih ruangah cansualnak khal ṭih loin cakpin an mawng ṭheu. Kan dung August 17, 2022 khalah Kawlram mi pawl phurtu motor a let ih mi 4 an thi. Mithi 3 cu Chinmi an si ih pakhat cu Rakhine mi a si.

Be the first to comment

Leave a Reply

Your email address will not be published.


*