Thailand Ih Um Myanmar Pacang In A Nupi A Vaw That, A Hnaṭuanpi Thawn An Hnamawk Lai A Hmuh Ruangah

Thailand, Chonburi khawpi ah Myanmar mi nupa tuakkhat cu hnaṭuan in an khuasa. Kumthar ni January 1, 2022 cu hnaṭuan an cawl ih an hnaṭuanpi mipa pakhat thawn an inn ah zu an intlang khawm. An hnaṭuanpi mipa cu an theihawknak thla 2 lawng a si lai.

An pathum in zu an intlang ih an nuamaw zet, innsang pabik cu ekinn sungah ava lut lawk ih cutawk ah a nupi le an hnaṭuanpi cu an rak hnamaw. Cutin an hnamawk lai cu ekinn sung ihsin arak hmu thei, asinan hmu lo bangin aum ih ava feh hnuah an titi.

An rualpa a tlun hnuah a nupi cu a vuak ciamco, a pum ah napin a sit ih phar ah a lu a sawh ciamco. Nupi vel thattu cu kum 40 mi Maung Zaw Min a si ih a nupi hmin cu Zin Mar Kyaw (kum 30) a si.

January 1, 2022 zan nazi 8:00 hrawngah a nupi cu a vel ciamco ih thisen a luak, a lu a kuai ih zianghman a thei nawn lo. A nupi sam in a dir ih an phar ah a lu a sawh. A nupi in zianghman a thei nawn lo ti a theih ruangah a thinphang tuk sal ih an innkiang ih um thildawr Thailand nu hnenah a nupi cu bike accident a tong ih a bese tuk tin bawmnak ava dil.

Thailand nu in siizung ambulance motor a phone sak lohli nan ambulance motor a thlen tikah cun a nupi cu arak thifel zo. Tualthattu Maung Zaw Min cu Thailand palik pawlin an kai ih a phutawk hremnak pe dingin an hruaisuak.

Be the first to comment

Leave a Reply

Your email address will not be published.


*