Thailand Miss Cu An Thantar Hmuhsuam Tin Taza An Cuai

Fala kum 22 mi Anchilee Scott-Kemmis cu Miss Universe Thailand 2021 laksawng ngahtu a si ih a hminthang zet. December 12, 2021 ah Israel ram ah leitlun huap mimawi zuamawknak 70th Miss Universe Pageant ah tel dingin November 22 sun ah an ram ihsin a poksuak. Thailand rampi aiawh ih teltu ding a si.

Israel ram a thleng hnuah himi zuamawknak ah thazang rak pe cio dingin a zuk cu an tarlang, a zuk ahcun Thailand thantar cu a liang ah a ret ih an thantar zuklem parah a ding. Amah tantu pawl cun sual ah an hmu lo, leiltun hmithmuh ah Thailand thantar a pholang tin thazang an pe sawn.

Culai ah palik bawi hminthang Sonthiya Sawasdee in himi zuk cu Thailand thantar hmuhsuamnak a si tin court ah taza ava cuai rupri. Sonthiya Sawasdee in, “Thantar cu rampi pakhat hrang a si, Thailand miss thawngthlak ding cu ka duhmi a si lo. Asinan milar hminthang a si ih amah thluntu mino tam zet an um.

A tuahmi vek an rung cawng ve pang ding ti ka phang, zuamawknak ih an hotu pawl teh ziangsi an khuaruahnak hi a si ding? Kei cun himi thantar an tuahdan cu ka cohlang lo ih daan vekin taza ka cuai” a ti.

Thailand Beauty Pageant Committee in, “Leitlun mipi pawlin Thailand thantar hi rak hmuh ve hai seh, Thailand thantar hi hminthang vivo seh timi lungthlitum thawn tuahmi kan si. Kan thantar hmuhsuamnak lamin kan tuah lo, zuk pawl khal delete sal thluh dingin kan theihter aw zo” a ti.

Thailand miss cu ziangvek hremnak an pe ding ti cu theih a si hrih lo, December 13 ah a thubuai cu relsak a si ding. Thailand daan le dun ah an thantar hmuhsuamtu, sumdawngnak ih hmangtu, thil pakhat khat cawngianak ih hmangtu pawl cu thiam lo an coter asilen kum 2 sung thawngthlak le 40,000 baht kuanter an si ding ti aum. Thailand miss cu 70th Miss Universe Pageant zuamawknak ah a tel dingih a thinum cu a nuam lo zet men ding. (#Bangkok Post)

Be the first to comment

Leave a Reply

Your email address will not be published.


*