Thailand Nga Hawltu Cu Zankhat Thilthu Ah Milian Maktara Ah A Cang >>>

Thailand, Surat Thani tipikap Niyom khua ih um pacang Narong cu zankhat thilthu ah milian maktara ah a cang. Innsang harsa zet an si ih nitinten eicop hawl ih hnaṭuan ṭheu an si, nga hawl in a poksuak ringring.

October 4, 2021 sun ah tipithuanthum parah nga a hawl rero laiah thil danglam zet a hmu. A thilhmuh cu ngapi luak a si, a theithiam lo nan TV ih a zoh ṭheumi ngapi luak an timi thawn a bangaw a ti tuk ruangah a la. Puante in a tuam ṭha ih a thup.

Cumi hnuah an sungkhat pawl hnenah a sim thei ih Prince of Songkla University ah zohdiknak an va neihter ih ngapi luak arak si ngaingai. Cun, Narong Phetcharaj ih hmuhmi ngapi luak cu US$1.25 million (AU$1.73 million) zat man hrawng a si.

Narong in “Kan khua pawlin ngapi luak hi an hmu dah hrih lo, an tham dah lo. Kan veikhat hmuhnak a si ruangah kan lungawi tuk, ka phur tuk ih ziang tuah ding ti khal ka thei lo. Ngapi luak a sinak cahnah certificate khal ka nei zo ih ka zuar ding.

Mankhung zetin ka zuar ngah asilen nga ka hawl nawn lo dingih ka cawl thlang ding. Ka rualpi pawl hrangah party nuam zet ka tuahsak ding” a ti. Tipithuamthum parih nga hawl pawlin ngapi luak hi an sar ngah ṭheu. Ngapi luak cu a rei tikah a rim a hmui deuhdeuh, curuangah rimhmui tuahnak Perfume Industry pawlin mankhung zetin an lei ṭheu.

Be the first to comment

Leave a Reply

Your email address will not be published.


*