Thailand Pacang In Kum 3 Sung Khuasia A Bia, A Dil Ṭheumi Aungbali A Poh Ngah Dah Lo Ruangah Khuasia Umnak Cu A Urkang

Thailand, Buriram District ih um pacang pakhat in kum 3 sung khuasia a bia. Zan a mang ah hlanlai pasalṭha lubul a hmu ih “Umnak ka nei lo” arak ti, a thaizing ah khuasia umnak inn khante a lei ih an innhmai ah a ret.

Cumi khuasia cu a bia ringring ih nitinten theitii le ei le in pawl a hlu ṭheu, kum 3 sung ah aungbali number a dil ṭheu ih a number simmi a dik dah lo ruangah a thinheng tuk. Tui thla sungah aungbali number 537 a lei ih aungbali number 579 in a poh ngah ruangah a thinheng tuk ih February 17 zan ah khuasia umnak inn te cu a urkang.

Khuasia umnak inn te a urkang laiah an sungkhat le vengsung mipi pawlin inndang ah a kangkai ding an phang ruangah tidai pung in meisa cu an mit tum nan inn neitu in funghreu thawn a kil ringring ih arak kham ruangah an mit ngam lo.

Inn neitu in, “Khuasia umnak inn te ka ret cu thuhlolak men a si, theitii le ei le in ka sung lak” a ti. Himi thuhla ah media pawlin Thailand ramsung ih um khuasia saya thu an va sut ih khuasia saya in, “A zummi le a biakmi khuasia umnak cu amah in a siatsuah, amai thubuai men a si.

Thungai cun khuasia umnak inn an tuah tikah ṭhaten upatnak le sawmnak puai pawl an tuahsak ṭheu. Khuasia upat peknak le sawmnak an tuah lo asilen khuasia lak khalah khuasia ṭha le sual an um ve ruangah khuasia sual khal an sawm ngah thei. Khuasia umnak an siatsuah ding tik khalah upat peknak an tuah hnuah hmun dangah an thawnawkter” a ti.

Khuasia umnak inn te urkangtu cu tualsung ṭuanvo neitu pawlin thubuai an tuahsak thu hmuh ding aum lo. 2018 kum khalah Thailand pacang kum 52 mi in vei tampi aungbali a lei ih a poh ngah thei lo ruangah amah le mah a urthat aw.

Zinglam nazi 5:00 hrawngah an vengsung ih um phungyi tlawnginn sungah ava lut ih a urthat aw, phungyi upa in zingthlapit ah meisa alh a hmu ih tualsung palik pawl a sim thei. Palik pawl an va thlen ahcun arak thi zo, a bawngbi sungah aungbali a leimi cahnah pawl an hmu, cun leiba tampi a nei ti khal an thei. Palik bawi in ‘mah le mah thataw a si’ tin a ngankhum ih a ruak cu autopsy tuah dingin siizung ah an tlanpi.

Be the first to comment

Leave a Reply

Your email address will not be published.


*