Thailand Ram Ah Duhdawtnak Thawn Mibumtu Pawlkom An Kai

Thailand, Chiang Rai ah duhdawtnak le sumdawngnak lem thawn mibum ṭheutu pawlkom an si. Thailand ramsung ah hivek ih mibum cu thilthar a si nawn lo. Tualsung palik pawlin an umnak hmun an theih veten May 13, 2022 ah an va lutchilh ih mibum hmang mi 24 an kai.

China mi 20 le Thailand mi 4 an si. Mipa 22 le nunau 2 an si. ‘Romance Scam’ tin an ko. An mibum dan cu online sungih zuk dangdang an la ih account lem an tuah, cutin online sungah mi dangdang an biakual vivo ih bum ding an hawl.

Duhdawtnak lam in an bia ṭheu ih an duhawk hnuah thilri bungrua kuat vekin an um, asinan airport le hmun dangdang ah an thilri bungrua cu a tang ih sumpai pek a ṭul tin an bum ṭheu. Sumpai an kuat hnuah an pehtlaih thei nawn lo, ṭhenkhat cu an duhawk hnuah sumpai an dil ṭheu.

Ṭhenkhat asilen hnaṭuan sang zet kai vekin an um, an mibum mi pawl lakah Japan mi an tam. Ṭhenkhat cu sumdawngnak tuahtlang dingin an bia ih sumpai an thawh hnuah an pehtlaih awknak cu an satcat.

Thailand palik pawlin an room sungah simcard dangdang thunaw mi mobile phone 224, computer 10, CPU 10 le thil dangdang an kai cih. An mibumnak ihsin thlakhat ah 25,000-35,000 baht an ngah ṭheu.

Zarhkhat sung hna an ṭuan ih zinglam nazi 9:00 ihsin zan nazi 9:00 tiang an ṭuan, zarhte le zarhpi ahcun sundir nazi 12:00 ihsin simlam nazi 5:00 tiang an ṭuan. An kaihmi China mi ṭhenkhat cu Thailand ramsung um theinak cahnah poimawh zianghman an nei lo, ṭhenkhat asilen an Visa a thi zo. An zaten mibum thubuai orhter ih an kai.

Be the first to comment

Leave a Reply

Your email address will not be published.


*