Hlanlai mifim pawlin ‘Ramkhel le sakhuanak hi a ṭihnung tuk, minung thluak a her danglam thei’ an rak ti. Thailand, Chaiyaphum ramlak ah sakhua danglam zet hruaitu an kai. Kum 74 mi Tawee Nanlan a si ih “Joseph” tin an ko, Joseph in ‘Sakhua zaten ih Pa bik ka si’ a tiaw.
Dungthluntu tam zet anei ih a hnenah an um thluh, a zun le ek an ei ṭheu ih harhdamnak hrangah a ṭha ti zumnak an nei. A zun le ek lawng siloin a cil, a vunmuat pawl khal an ei. A zun le ek an ei asilen an harhdamnak a ṭha ding, Covid-19 khalin a neh lo ding ti zumnak an nei.
A inn ah mithi ruak 11 an hmu ih nauhak kumkhat mi ih ruak khal a tel, mithi ruak pawl cu an thui ve thei lo ih ziihmui jasmine vekin an hmui thu a dungthluntu pawlin palik hnenah an sim thei. Mithi ruak pawl cu vanram feh dingin an hngak lai an ti. Joseph in a dungthluntu pawl cu a zun le ek ei dingin a fial lo, an zumnak le thilti theinak in an ei thu palik hnenah a sim.
Kum 53 mi Khun Jenjira in, “Ka nu 80 mi khal a hnenah aum ve, kumkhat sung aum zo. Ka nu cu ka va tong ih a cangvaihdan mak zet ka hmu, ka nu in an hruaitu cil, khak in a hmai a phiah lai ka hmu, cun vunmuat a ei lai khal ka hmu ih ka lau tuk. Ka nu in a thih tikah a ruak cu hitawk hmun ah ret dingin in fial” tin palik hnenah thubuai a thehlut hnu ihsin sakhua danglam zet hruaitu cu an va kai.
A inn sungah mithi ruak 11 an hmu ih siibawi pawlin ziangtin an thi tin an zohdik rero lai. Tualsung mipi pawl khalin an khua ah hivek sakhua danglam zet aum ti an theih cu mak an ti tuk. Palik pawlin a dungthluntu pawl hnenah a thusim mi pawl zum lo dingin forhfialnak an nei. Mithi ruak pawl ih thihdan an theihfiang hnuah an hruaitu Joseph cu hremnak an pe ding.
Leave a Reply