Thailand Ram Ah Tulai Natnak (MonkeyPox) Nei A Tlansuak Ih Cambodia Ram Ah An Kai Ngah

Tulai leitlun huap ih an ṭih bik mi natnak cu MonkeyPox timi natnak a si. Thailand ram ih tlawng Nigeria tlangval kum 27 mi cu a damlo ruangah siizung ah ava piah aw ih monkeypox anei ti an hmusuak.

Thailand ram ih a hmaisabik monkeypox natnak neitu a si cih, Thailand ramsung ih aum theinak Visa khal a cem zo. Kilhim awk tello in nunau arak itpi thu khal theih a si, a feh ṭheunak hmun pawl ah natnak nei an um le um lo an va zingzoi rero lai.

MonkeyPox natnak cu a ṭihnung zet ih 1970 kum ah Africa ramsung ah an rak hmu thok, a reh lawk nan tulai ah a suaksal ih July 24, 2022 ah World Health Organization (WHO) in leitlun huap ralrinnak dar an tum. Monkeypox nat nei 95% cu nupa-sinak ihsin an kaiaw.

Thailand siizung ah monkeypox natnak neitu Nigeria tlangval cu a tlansuak ih palik pawlin an hawl rero nan an hmu thei nawn lo, an phone fehtlang ihsin an zohnak ih July 22 ah Cambodia ram a lut ti an thei. Cambodia palik pawlin an hawl ciamco ih July 23 sun ah bazar ah an va kai ngah.

Cambodia ram ih monkeypox natnak nei hmaisabik tu ava si lala. Ramri a lut hnuah a fehnak hmun le a tong mi pawl cu ṭuanvo neitu in natnak an kai le kai lo zohdiknak nei dingin an zingzoi rero lai. Thailand siizung ihsin a tlansuah theidan cu damlo ṭhenkhat in an rak bawm thu a phuang aw, Thailand palik pawlin a tlansuah theinak dingih bawmtu pawl cu thubuai tuahsak dingin an tawlrel rero lai.

Cambodia ram a thleng hnuah minung tamnak Sihanoukville tipikap ih feh a tum nan fehsal loin Nigeria pawl umkhawmnak Phnom Penh khua ih a feh thu palik hnenah a phuang aw. Cambodia palik pawlin siizung ah an hruailut ih an tuamhlawm rero lai.

Be the first to comment

Leave a Reply

Your email address will not be published.


*