Thailand Ram Ih Hlo Karen Pacang Cu Kum 8 Hnu Khalah A Ruak An Hmu Lo

Kum 8 liamzo April 17 2014 ah Thailand, Phetchaburi province ah Karen pacang “Billy” Rakchongcharoen cu a hlo ih tuini tiang a thuhla theih ding aum nawn lo, a nupi le a fanau cu mangbang anhai in an um.

Kaeng Krachan National Park sungah khuaitizu a lak lai ruangah park ṭuanvo neitu Chaiwat Limlikitaksorn le a kuthnuai minung 4 in an kai ih cutin a hlo thok. 2019 kum ah park sungah minung ruhro an sar ih DNA an zohdik, Billy nu ih DNA thawn an zohdik ih a milawk ruangah Billy cu misual kuttuar in a thi si ding ti zumnak an nei.

Park kiltu pawlin Billy an kaih hlanah buainak an nei zo, Billy cu Thailand ramsung ih um Karen miphun pawl hruaitu upa pakhat a si. Park kiltu Chaiwat Limlikitaksorn le a kuthnuai pawlin 2011 kum ah Karen pawl umnak Pong Luk Bang Kloy khua ah inn an urkang ih innsang 20 cu an dawitlan.

Cumi thuhla ruangah Billy in Chaiwat le a kuthnuai minung 4 cu taza a cuai ih buainak an nei. Kum 3 hnuah Billy cu khuaitizu a lak ruangah an kai ih a hlo lanta. A nupi Phinnapha in ‘kan khua thuhla buainak ruangah ka pasal in taza arak cuai, cumi ruangah Chaiwat le a kuthnuai pawlin an that a si ding’ tin DSI hnenah zingzoinak tuah dingin thubuai a thehlut.

December 2019 kum ah Chaiwat le a kuthnuai mi 4 cu tualthattu ih rinhlel in an kai lawk nan 800,000 baht in an tlensuak thluh, Chaiwat le a kuthnuai mi 4 in Billy a hlotnak thuhla ah pehtlaih awknak zianghman an neih lo thu court hmaiah an sim.

Chaiwat le a kuthnuai mi 4 cu an suah zalen sal ih 2020 kum ah Billy ih hlotnak thubuai khal an khar lawk. Billy thuhla buaipitu in, “Billy a hlotdan thuhla kan rel tinten Karen miphun pawl hmuhsuamnak an tonmi khal kan thei ringring lai. An umnak inn ihsin an dawitlan lai hi kan theihhngilh nawn lo ding” a ti.

Be the first to comment

Leave a Reply

Your email address will not be published.


*