Thailand Ram Ih Hnaṭuan Kawlram Mi Cu Covid-19 Siivai Ruangah A Thluak Hnaṭuandan A Dik Lo, A Thi Zik

Shan State, Hsipaw khua ih um fala kum 31 mi Ma Thein Nyunt cu 2014 kum ihsin Thailand ramsung ah hnaṭuan in arak um zo. 2021 kum sungah thlakhat veikhat dawt ding mi Covid-19 siivai cu an hnaṭuannak an pu in ni 15 ah veikhat a dawtter.

Veihnih a dawtawk hnuah ziangtin hman aum lo ruangah ni 45 hnuah a veithumnak a dawtawkter sal ih a talbuai. A lei ah meiling hmawm vekin aum. A naunu in, “Hitin aum laiah a khuasik bet, siikhan kan fehnak khalah thil a theithei lo. Tu’ah a sam khal an tla kolh thluh zo.

A caan len zianghman thei lo vekin aum. A umnak le a eimi siivai pawl cu Thailand ṭong in an ngan ruangah ziangvek siivai ti khal kan thei lo” a ti. Ma Thein Nyunt ih dinhmun cu a sia deuhdeuh ruangah a innsang pawlin Myanmar ah tlungsal dingin an tawlrel nan a tlung thei hrih lo.

Thailand-Myanmar ramri Muse riahbuk ah aum lai. A innsang pawlin Ma Thein Nyunt hruai dingin motor an sang ih an thlah nan a tawl tuk ruangah an phur ngam lo, lamlak ah an kutsung ah thil pakhat khat a cang pang ding ti an phang ruangah an phur ngam lo. Ma Thein Nyunt cu an khua ah a tlung thei hrih lo ih a innsang pawlin an seherh tuk. A naunu in, “Ziangtin kan tuah ding ti khal ka thei nawn lo” a ti.

Be the first to comment

Leave a Reply

Your email address will not be published.


*