Thailand Ram Ih Hnaṭuan Kawlram Mi Fala Cu Pawngsual A Si Hnuah An Urkang

Thailand ram ih um Kawlram mi fala kum 21 mi cu November 14, 2021 ah a thuhla theih ding um loin a hlo thutthi, Thailand tualsung thuthang khalah a hloh thu hi an tarlang rero. Zinglam nazi 8:00 ihsin 10:00 karlak hrawngah a hlo tin a unu in a rel. Anmah hi Karen miphun an si.

An umnak cu Bin Buri Township, Prachin Buri District, No. 124th ah a si. Thailand palik pawlin an hawl rero nan an hmu thei lo. A unu Ma Myat Myat Aye in, “Kan nauta bik a si, ka nau pahnih cu pasal an nei veve zo ih anih cu anei hrih lo. Ka pasal thawn innkhat ah kan umtlang khawm, a khan sung zoh tikah kut an thlak hnuah an hruaisuak a si ding.

A khan sungih an sulhnu pawl zoh tikah an sualaw nasa a si ding, a thilri bungrua pawl khal an let thluh. A ihkhun kiangah thisen aum, palik sakhan ah mihlo thubuai kan va thehlut zo. A hmin cu Ma Myint Myint Khaing a si, tu cun a hlotnak hi ni 3 a si zo. Tlangval dung thlun ih tlan cu a si zik lo ti kan zum, an sulhnu pawl zoh tikah an hruai suahdan hi a pangai lo” a ti.

Palik pawlin a khan sungih tetti an hmuhmi pawl an la thluh ih mi pawngsualtu cu an zingzoi vivo hnuah an kai ngah. Ma Myint Myint Khaing pawngsualtu cu Thailand mi a si ih kum 27 mi a si, meisa tuahtu (Electrician) a si.

Ma Myint Myint Khaing cu a pawngsual hnuah a urkang ih khua dangah a tlan, asinan Thailand palik pawlin an hawl vivo ih November 19, 2021 ah a tlannak khua ah an va kai ngah ih a thilsual tuahmi khal a phuangaw. Meisa tuahtu le Ma Myint Myint Khaing hi company pakhat ah hnaṭuan tlang an si.

Thailand tlangval in, “Zan ihnak kor a hruh lai ka hmu ih ka thinlung ka control thei nawn lo, ka supaw thei nawn lo ruangah a khan sungah ka va lutchilh.

Ausuak thei lo dingin napin ka sit, a kut cu hridai in ka tawnbet ih a kaa khal tap in ka erhpit. Cutin ramlakah ka hruai ih ka pawngsual hnuah tili ah ka hlon, a thaizing ah a ruak cu ziamralter dingin ka urkang” tin a phuangaw. A phutawk hremnak tuar dingin an buaipi rero lai.

Be the first to comment

Leave a Reply

Your email address will not be published.


*