Thailand Ram Ih Hnaṭuan Kawlram Nu In Awngbali 6 Million A Poh Ngah Ih An Pu In 1 Million Lawng A Pe, Cumi Hnuah Buainak A Tong Vivo

Thailand, Bangkok khawpi ih hnaṭuan Myanmar fala kum 20 mi Nang Daw in Thailand awngbali 6 million (6,000,000) a poh ngah nan an pu in one million lawng a pe. July thla cem zik zawngah an pu in a birthday party a ṭuan ih hnaṭuantu 16 thawn rawldawr ah rawl an va ei.

An rawlei laiah awngbali zuar an va ih an pu in pakhat ciar a leisak. An pu in “Nan poh ngah asilen a hrek veve kan ṭhenaw ding” a ti, July 1 sun ah awngbali result a suak ih Nang Daw ih awngbali number 713517 in pakhatnak laksawng a ngah.

Hnaṭuantu zaten an lungawi tuk ih an pu hnenah an sim thei, an pu in awngbali cu a laksak ih ziangkim a tawlrel. An pu in Nang Daw hnenah ‘Hnaṭuantu 16 pawl khal, mi pakhat ah thawng 50 ciar na pe ding, cun awngbali cazin ngantu hnenah ting 2 pek a ṭul a tiih Nang Daw khalin a cohlang.

Cutin a hrek veve an ṭhenaw dingih Nang Daw in 2 million le ting 2 a co ding tin an lungkim. An pu in paisa ava suah ih July 4 sun ah 1 million baht lawng a pe, hnaṭuantu 16 hnenah sumpai zianghman a pe lo. An pu in “Thlatinten bank ihsin thawng 50 ka lo kuat ṭheu ding” a ti.

Cumi hnu ihsin an pu in a zohṭha nawn lo, an company ih hnaṭuan a tlangval khal a hmuhsuam ih hnaṭuan harsa a fial ṭheu. An tuar thei nawn lo ruangah an pahnih in an suak, July 29 sun ahcun danglam zetin an umnak inn ah Thailand palik pawl an va lut thutthi ih hnaṭuan theinak card an nei le nei lo an ra check.

Hnaṭuan theinak card neilo pawl cu an kai, a tlangval khal a card arak thi zo ruangah Thailand palik pawlin an kai ih Min Buri palik sakhan ah an khum. Kum reipi sung hnaṭuan in an rak khuasa zo ih palik check-up tivek khal an tong dah lo, awngbali thuhla ah an pu thawn an buai hnu ihsin palik pawlin an va check-up thutthi ruangah an pu in a hek a si ding ti an zum.

A tlangval thubuai cinfelnak dingah a sumpai dang cu an pu hnenah ava dil ih arak pe duh nawn lo. Amarin News Agency pawlin an pu cu thu an va sut ih awngbali a poh lo arak ti, innluah man an pek thei lo ruangah thuphan an per ih ka hnenah hna an ṭuan nawn lo ruangah ṭuanvo ka laksak thei lo arak tisan men.

Amarin News Agency pawl khal ramri langin nan ra cangvai ruangah taza ka lo cuai ding tin arak hringhro bet. Amarin News Agency pawlin a birthday sun ih an rawleinak ah thu an va sut ih dawr kiltu in ‘Rawl an ei laiah awngbali zuar ara ih pakhat ciar a pe” tin arak simfiang.

Thailand lawyer pakhat in ‘Ramdang mi hnaṭuan pawlin awngbali an poh ngah ahcun sumpai an ngah thei ko. Umhmun khuar theinak card an neihlonak thuhla cu thuhla dang a si’ a ti. An pu hi taza an cuai ve asilen mibum thubuai orh thei ringring a si, asinan anmah khal thubuai mallai cu an neih phah ding ti a zumum. Ziangtin an cangvai vivo tum ti cu theih a hrih lo.

Be the first to comment

Leave a Reply

Your email address will not be published.


*