Thailand Ram Ih Thawngtla Kawlram Mi (2) An Suah Theinak Dingah Australia Daanthiam In Thailand Siangpahrang Hnenah Zangfah Dilnak Ca A Kuat Ding

Thailand ram ah British mi pahnih thattu tin an kaihmi Ko Win Zaw Tun le Ko Zaw Lin cu damsung thawngtla dingin Thailand thawnginn sungah an khum. Australia daanthiam lawyer in an suah theinak dingah Thailand siangpahrang hnenah zangfah dilnak ca a kuat ding.

Thailand ramsung ih um Kawlrammi pawl bawm ṭheutu FED pawlkom ih an hotu U Min Oo in, “Siangpahrang ih hmeltheih le a nelmi hnenah bawmnak kan va dil ih kan naule pahnih an suah theinak dingah in tawlrel sak dingin bawmnak kan dil” a ti.

Australia daanthiam lawyer in Thailand siangpahrang le a rualpi ramdang palai, siangpahrang ih uk mi ram pawl hnenah zangfah dilnak ca a kuat ding.

Zangfah dilnak cahnah hi page 9 aum ih “Kawlram mi pahnih ih thubuai hi anmai tuah ngai mi si ka zum lo. Innsang harsatnak ruangah Rakhine ram ihsin Thailand ram ah hnaṭuan dingin an ra. An umnak ram, an nulepa hnenah kuat tlung hram dingin zangfah ka lo dil…’ tipawl a ngan.

July 26 ah Thailand siangpahrang ih rualpi Germany hnenah zangfah dilnak ca hi an kuatfel zo. September 15, 2014 ah Thailand tipikap ah British nunau le mipa cu that an si, nunau hi pawngsual a si ih an thilri bungrua pawl khal laksak a si.

Himi tipi kiangkap ah Kawlram mi hnaṭuan an tam zet. Kiangkap ih hnaṭuan Kawlram mi pahnih Ko Win Zaw Tun le Ko Zaw Lin cu Thailand palik pawlin an kai ih an kaih pekte ahcun tual an that thu an phuang aw. Asinan, neta ah palik pawlin an hrem nasat tuk ruangah diklo zetin an phuangawk thu court hmaiah an sim thei.

Ko Win Zaw Tun le Ko Zaw Lin cu tualthat thubuai, mi pawngsual thubuai le rukru thubuai pawl an orhter ih 2015 kum ah thihdaan an orhter. October 24, 2019 ah Thailand siangpahrang hnenah ngaithiam an dil.

Thailand siangpahrang in a suahcam December 5, 2020 sun ah a ngaidam ih thihdaan ihsin damsung thawngtla dingin thuthluknak a tuahsak. Tu’ah Myanmar ram ah kuat tlung dingin Australia daanthiam hohanak in an tawlrel rero lai.

Be the first to comment

Leave a Reply

Your email address will not be published.


*