Thailand Ramsung Ah Kawlram Mino Pawl Meithal Le Nam Kengin An Sual Aw Ciamco

Thailand, Mae Sot khuasung lamzin parah Kawlram mino rual cu meithal, fung le namtong kengin an sual’aw ciamco. Kiangkap ih um Thailand mi (5) in hliamhma an tuar.

Kan dung zarhte June 18 zan ah mino pawl cu ṭongkam an el’aw ih meithal in an kapawk thu Thailand thuthang sungah an tarlang. Thailand lamzin ih kapaw tu pawl cu Kawlram mi an si, Mae Sot khua ih um an si tin an tarlang.

Mino 10 lenglo an si ih 4 cu June 21 zingpit ah Thailand palik pawlin an kai ngah. Midang khal kai dingin an hawl rero lai. An kahawknak ah mithi an um le um lo cu an tarlang lo nan kiangkap ih um Thailand mi (5) in hliamhma an tuar, hliamhma tuar lakah nunau nauhak kum 13 mi khal a tel.

Mae Sot khua ih um Thailand mi in, “Mae Sot lamzin parah meithal in an kapaw ih nam in an sat’aw. Khuasung rori ah misual pawlkom vekin an cangvai cu kan lau tuk, a cang thei lo. Hivek cu kan cohlang lo a si” a ti.

Thailand palik pawlin sualaw tu mino pawl cu kai dingin an hawl rero. Kawlram mi umnak innsung ah an va lut vivo ih zingzoinak an nei. Lamzin ih feh an rinhlelmi khal an dingter ih an bags sung pawl an zohdik sak thluh.

Kawlram mi pakhat in, “Mae Sot ih um Kawlram mi pawl kan ralring a ṭul tuk. Palik pawlin an hmuhhmuh cu thusutnak an nei vivo. Thirleng, bike mawng pawl khal thu an sut. Innkhat hnu innkhat ah an lutsuak vivo” a ti. Thailand ṭuanvo neitu pawlin sualaw tu mino pawl cu Myanmar ram ah an lut zo men thei an ti.

Be the first to comment

Leave a Reply

Your email address will not be published.


*