Thailand Ralkap Pawlin Kap Dingin Tim An Tuah Aw

Thailand ralkap le Myanmar ralhrang pawl hi doaw thei dinhmun ah an um ih an boruak a ṭha lo zet. Ralhrang pawlin Thailand-Myanmar ramri ih um KNU pawl an va kap ciamco ih tualsung mipi kilhimtu le KNU tangtlang in an rak kap ve. An doawknak ah ralhrang 30 an thi ih 40 lenglo in hliam nazet an tuar, cun ralhrang ṭhenkhat cu nungdam in an kai ngah.

Ralhrang pawlin bomb le pukpi in KNU hmunram sung cu an hei kap ciamco ih an cerek mu cu Thailand ramsung ah ava tla puak ruangah raltlan putar pakhat in hliamhma nazet a tuar. Kiangkap um Thailand mipi pawl khal an thlaphang tuk ih an tlan ciamco, ralhrang pawl ih ralthuampi ruangah Thailand ramsung hmun ṭhenkhat a kang.

December 16 sun an doawknak ah ralhrang ralhuampi 4 rori Thailand ramsung ah ava tla puak. Cumi hnuah Thailand ralkap pawlin, “Neta ah ralthuampi ara tla puaksal asilen kan lo kap hngal ding” tin ralrinnak an pe.

Ramri ih um thuthang latu in, “Thailand ramsung ah ralthuampi a tla puak ruangah Thailand in ralrinnak an pe. Ralthuampi ara tlasal asilen ralthuampi an kahsuahnak hmun pawl cu hitawk ihsin kan kap ciamco hngal ding’ tin ralrinnak an pe. Tu’ahcun meithal awn khal a dai zo, ziangtin an um vivo ding ti cu theih a si lo.

Tuiṭum telin Thailand ramsung ah ralhrang pawl ih ralthuampi hi vei 4 a tla puak zo, ziangthil a thleng vivo ding ti cu theih a si lo ih kan rak cuan hnik ding” a ti. Hitin Thailand ralkap pawlin ralrinnak an pek hnu a zan ah ralhrang ralthuampi cu Thailand ramsung ah ava tla puak sal.

Thailand ram ih um thuthang latu in, “Sun ah ralhrang ralthuampi vei 4 a tla puak zo ih Thailand ralkap pawlin ‘Ara tla puak sal asilen ralthuampi kahnak hmun pawl cu kan kap ciamco hngal ding’ tin ralrinnak an rak pe zo. Tuizan ah a tla puak sal, phone thawn an beaw ih ṭongkam an el’aw ciamco ti kan thei, Thailand ralkap pawl cu an lungawi lo tuk. Ralhrang pawl kap dingin ralthuampi pawl an timtuah aw rero lai, an boruak cu a sosang vivo” a ti.

Be the first to comment

Leave a Reply

Your email address will not be published.


*