Tulai hi Thailand ram ah ruah nasa zetin a sur ciamco ih ti a lian, lei a min. Chon Buri province ramsung ah ti a lian zet. July 21, 2022 simlam nazi 4:00 hrawngah Chon Buri province ih hnaṭuan Kawlram mi 2 le Thailand mi pakhat cu Ban Bueng khua ah vur pe dingin an poksuak.
Motor mawngtu cu Thailand mi a si. Khao Khan Song ramsung ah an tlan laiah ti a lian thutthi, lamzin ah ti a lian ih an motor cu tiva ah a thiarlut. Kum 41 mi Thailand mi cu a tlansuak thei nan Kawlram mi pahnih cu tiva ah an fen hlo.
Motor mawngtu in, “Motor hi muka in kan khuh. Tiva ih kan tlak veten kan tlansuak man, tiva thazang a cak tuk ruangah hmun hlanpi kan rak thleng man. Thingbul ka kai ngah ih muang teten tivakap ka thleng thei. Motor sungih um Kawlram mi pahnih cu motor sungah an tang” a ti.
Tualsung mibawmtu pawlkom in an hawl rero hnuah an motor cu an hmu nan a sungah zohman an rak um nawn lo. An zumdan cun motor sung ihsin an tlansuak thei ih tiva in a fen hlo si ding an ti.
July 22 ah Kawlram mi pakhat cu thicia in an hmu ih pakhat cu an hawl rero lai. Thailand ram ah hnaṭuan lai ih thi an si vekin Thailand cozah in an tantami innsang hnenah zangnadawmnak an pe ding.
Leave a Reply