Thailand Tlangval In A Pi Sumpai ฿300,000 A Ru Ih Miharsa Pawl A Pe Thluh

Thailand, Buriram ih um tlangval kum 39 mi Wuttisak in a pi ih sumpai ฿300,000 zat a ruksak, a pi ih bank card a ruksak ih ATM ah sumpai a suah, bazar ah ava feh ih miharsa pawl a pe vivo.

฿109,000 zat cu sumpai in a pe thluh, ฿200,000 zat man thilri bungrua ṭhaṭha a lei ih miharsa pawl hnenah a pe thluh. CCTV an zohnak ah zarhte simlam nazi 3:00 hrawngah sumpai a pek lai cu an hmu. A pi kum 70 mi Somwang in palik sakhan ah thubuai ava thehlut ih a sumpai cu ngahsal dingin a dil.

Palik pawlin sumpai latu pawl cu pe kirsal thluh dingin theihternak an suah. CCTV ih an hmuhmi pawlin sumpai an pe kirsal lo asilen thubuai orhter nan si ding an tiih 2,900 baht lawng an ngah. Wuttisak in a pi hnenah ngaithiam a dil ih zarhte zinglam ah sumpai a ruk thu a phuangaw.

Wuttisak in, “Ka pa thizo hrangah thilṭha ka tuahsak. Sumpai ka ru nawn lo ding” a ti. Pitar Somwang in, “Ahlan khalah ka tupa in suiṭhi in ruksak ih a zuar hnuah sumpai cu midang hnenah a pe thluh. A hlu hrangah a tuah, mual liamzo ka fapa hi ka duhdawt tuk ruangah a aiah a fapa hi keimah in ka kilkhawi” a ti.

Be the first to comment

Leave a Reply

Your email address will not be published.


*