Thailand Tlawng Sayama (2) Tiva Ah An Dawp That, An Thatawknak Ca An Tanta

Thailand, Muang district ih tlawng sayama ṭuan lai le sayama ihsin colh la zo pakhat cu thinhar beidonnak an neih ruangah August 16, 2022 sun ah tiva ah an dawp that. An pahnih in Nong Khansong School ah sayama an rak ṭuan tlang zo.

Kum 45 mi Paweena le kum 61 mi Lakkhana an si ih sungkhat naiaw te an si. Tualsung mi pakhat in, “Zinglam nazi 11:45 hrawngah lilawn parah nunau pahnih ka hmu ih ka ngaihsak lemlo. Neta ah tiva ah thil tla awn ka thei ih nunau pahnih cu an rak um nawn lo. An kedam lawng ka hmu ih tiva ah an dawp” a ti.

Kiangkap ih um pawlin palik an ko ih an hawl rero nan an hmu thei lo. An motor sungah an thatawknak cahnah an hmu. Kum 45 mi Ms Paweena ih cangan mi ahcun a thiltuah mi ruangah a fale pahnih hnenah ngaithiam a dil ih sumpai a bak mi pawl hnen khalah ngaihthiam a dil.

Ms Paweena in, ‘Bum ka tong ruangah ka tlasia thluh ih midang sumpai ka cawi’ tin a ngan. An leiram khal sumpai thuhla ruangah a pawng ih a fale pawlin sumpai cu rung pe leh dingin a ngen. Sumpai a cawinak tei phone number khal a ngan.

Kum 61 mi Ms Lakkhana khalin a fale pahnih hnenah ngaithiam a dil ih nan nute thawn thilṭha bik kan tuah’ a ti. A zan ah Ms Lakkhana ih ruak an hmu ih a thaizing ah Paweena ih ruak an hmu. Mithi ruak pahnih cu siizung ah an phur ih zohdiknak an nei rero lai.

Be the first to comment

Leave a Reply

Your email address will not be published.


*