Thantlang Bomb Puak Ih Hliamtuar Tleirawl A Thi

August 27, nazi 1:15PM hrawngah Thantlang, tlawnginn veng sungah bomb a puak ih inn neitu Pu Hlei Bik (kum 40) a thi, hliamtuar 11 an um ih Thantlang siizung ah an tuamhlawm. Minung 3 cu an bese tuk ruangah Hakha siizung ah an tlanpi ih mibawmtu mino pawlin thisen an hlu.

Hliamtuar 11 pawl cu: (1). Phir Cung – kum 12, (2). Biak Tling Cung – kum 26, (3). Tha Peng Lian – kum 28, (4). Bawi Lian Hum – kum 29, (5). Tial Thawng – kum 36, (6). Bawi Nawl – kum 27, (7). Pu Mang Lian Chawn – kum 56, (8). Fung Lian Thang – kum 32, (9). Pu Than Ceu – kum 50, (10). Tluang Bawi -kum 29, (11). Uk Lian Kam – kum 14 pawl an si.

August 25 sun ah ralkap le mipi kilhimtu pawl an doaw ciamco ih ralkap in khuasung ah meithal le bomb an kap. An doawknak ah nauhak kum 10 mi Van Bawi Thang ih nunnak a liam. Ralkap pawlin inn 13 le bike 4 an kap siat.

August 27 sun ah innsiat pawl an remnak ah inn sungah bomb a puak lo mi an hmu ih innleng lam an suahpi hnuah a puak cu mithi le hliamtuar an um. August 28 zingah Hakha siizung ih an tuamhlawm mi bomb puak hliamtuar tleirawl kum 14 mi Uk Lian Kam cu a hliamhma tuar nawn loin a thi. A ruak cu Thantlang ah an tlunpi lai.

Pu Ram Khar in “Pa Uk Lian Kam hi hliamhma nasa zet a tuar ruangah Hakha ah an tlanpi, hliamtuar bese 3 lakih pakhat a si. Tu zanlam Augsut 28 ah a ruak vui a si ding” tin The Hakha Times hnenah a sim thei.

Be the first to comment

Leave a Reply

Your email address will not be published.


*