Thantlang Innkang Cu Ralkap Pawlin An Rak Zoh Men, Ralkap Pawlin Thantlang Inn 184 An Urkang Zo

October 29, 2021 zinglam ihsin ralkap pawlin Thantlang khawpi an urkang ciamco. himi sun lawngah inn 164 an urkang. Ralkap thuphuangtu Zaw Min Tun in “Ralkap pawlin Thantlang innkang an va thelhmit tum nan PDF pawlin an rak kap ruangah an mit thei lo” tin ralkap thuthang ah a phuang.

Thantlang ah PDF an um le um lo khal a thei lo. Anmah ralkap pawlin Thantlang innkang cu online parah an tar ciamco ih Thantlang innkang cu View Point ihsin an rak zoh men. Ṭhenkhat cu ralkap uniform an hruh lo ih mipangai vekin an um.

Min Aung Hlaing in ramsung thuneihnak a lak hnu February 1, 2021 ihsin tuini tiang ah Thantlang inn 184 an urkang zo, cun khuasung mi 7 an that. September 9 ah inn pakhat an urkang, September 18 ah riahbuk telin inn 19 an urkang, October 29 ah inn 164 an urkang ih zaten kom cun 184 a si.

February ihsin November thla sung, thla 10 sungah khuasung mi 7 an that. Ralkap kutsung ih mual liamtu pawl cu September 29 ah kum 59 mi Pu Hram Cung le kum 77 mi Pu Ral Tu, August 28 ah kum 14 mi Pa Uk Lian Kam le kum 45 mi Pu Hlei Bik, August 25 ah kum 10 mi Pa Van Bawi Thang,

September 18 ah Pastor Cung Biak Hum (kum 32), September 12 ah kum 25 mi Pu Van Za Ceu pawl an si. Pu Van Za Ceu ih ruak cu tuini tiang an hmu thei hrih lo ruangah ralkap pawlin an ziamralter si an zum. Min Aung Hlaing in ramsung thuneihnak a lak hnu ihsin Chin ram, Thantlang khawpi ih inn 184 a urkang ih minung 7 ih nunnak a laksak. Khaumi 20 lenglo in hliamhma an tuar ih khuanu khuapa zaten hmun dangah an tlan thluh.

Be the first to comment

Leave a Reply

Your email address will not be published.


*