Thantlang Innkang Lakih Inn Neitu 2 Cu Lunglei Khawpi An Thleng Hnuah Chanmari Lunglei Hruaitu Pawlin Bawmnak An Pe

September 18, 2021 simlam nazi 3:00 hrawngah ralkap pawl ih bomb le meithal ruangah Thantlang inn 19 cu a kangral thluh. Cumi kangmei thelhmit dingih poksuak pastor khal an rak kap that ih a kutzung an tansak hnuah a zungbun an laksak.

Ralkap in an urkaan mi inn pahnih neitu Pu (–) le innkang pakhat ih an fapa cu dam le tluang zetin Mizoram, Lunglei khawpi an thleng thu theih a si. Chanmari Lunglei hruaitu pawlin an rak hmuak ih an ṭulsammi hnipuan, zanpuan sin ding pawl an tawlrel sak thluh.

October 10, 2021 zanlam nazi 6:00 ah Chanmari Veng hruaitu le Chin Welfare Organization hruaitu pawl thawn raltlan umnak hmun ah an va tong ih caan an hmantlang. Lunglei khawpi ih um raltlan pawl cu khuatlang hruaitu le tualsung mipi pawlin an ngaihsak zet ih an bawm ṭheu.

October 3, 2021 khalah an hnenih um raltlan pawlin Mizoram sungih um an sungkhat pawl an pehtlaih thei ih an hnenah an va feh tum ruangah Chanmary VC House ah raltlan pawl thlahnak an nei. Chanmari hruaitu pawlin an fehsuaknak ding motor man khal an tumsak thluh, lamzin ih an hmang ding sumpai khal an pe.

Tualsung mipi pawl khalin sin le fen, hnipuan pawl an pe, Zawngling ihsin Lunglei an fehnak Rs.30000 hrawng khal tumsak a si. Lunglei, Chanmari veng ih thiltuah mi parah Chin Welfare Organization khalin lungawithu a sim thei. (#Salai Charlie Zakapa, President Chin welfare Organization)

Be the first to comment

Leave a Reply

Your email address will not be published.


*