Thawnginn Sungah A Nu Thawn An Khummi Nauhak Kum 2 Mi A Thi

Rakhine State, Thandwe thawnginn sungih an khummi nauhak kum 2 mi cu mizan February 17 zan nazi 11:00 ah thawnginn sungah a thi. Thla 3 liamzo ah ralhrang pawlin Thandwe khua ih um nunau 3 cu dothlennak ah nan tel tin an va kai.

Ma Nyein Ei Phyo Kyaw khal an kai, a fanu kum 2 mi Ma Shwe Yee Win cu thawnginn sungah a hruaitel ih thawnginn sung an harsat tuk ruangah a thi. An sungkhat in, “An kaih pekte ahcun a fanu cu a pa hnenah aum, asinan Ma Shwe Yee Win in a nu hi a ngen ringring. A nu hnenah aum duh sawn, curuangah a nu hnenah um dingin an dil ih an umter” a ti.

Nauhak Ma Shwe Yee Win hi a suah ihsin damlonak neicia a si ih a harhdamnak a ṭha thei lo, operation khal an tuah zo. Thawnginn sungah harsatnak phunphun a tong, an rawlei a se tuk, boruak a dai tuk ruangah zan khalah a itthat thei lo ih a ṭap ringring.

Tualsung mi pakhat in, “Thawnginn sungah nauhak hi a itthat thei lo ih a ṭap ringring. Thawnginn kiltu pawlin a nu cu an kawk, an hringhro ṭheu. A itthat theinak dingah a nu in hla a saksak ih thawnginn kiltu pawlin thawnginn sungah hla an sak dah maw si tin an kawk ciamco. Nauhak ruak cu sibawi in operation in an zohdik ih a dang a thling thluh ih a pit” an ti.

Ma Shwe Yee Win telin an kaihmi nunau pathum cu tlawngkai ningan tinten court hmaiah an feh ṭheu. A pi in, “Tuiṭum court hmai ih an feh tik ahcun ka va feh duh lo, ka thin a naa tuk. Ziangtin naute nui mithmai ka tong ngam ding, a hmai ah ka ṭap ciamco pang ding ka phang” a ti. Mual liamtu nauhak kum 2 mi cu February 19, 2022 ah an khua ah an vuiliam ding.

Be the first to comment

Leave a Reply

Your email address will not be published.


*