Thawnginn Sungah Covid-19 A Darh Ciamco Ruangah Thawngtla Ṭhenkhat An Suahsal Ding, Asinan An Suah Ding Pawl Cu A Danglam

Thawnginn sungah Covid-19 a darh ciamco ruangah an buai zet, thawngtla pawl khal an damlo ciamco ih mithi khal an um hnuaihni zo. NLD sungṭuan Nyan Win khal Insein thawnginn sungah Covid-19 a kai ih a damlo bese tuk ruangah Yangon General Hospital ah an tuamhlawm nan a na tuar loin a thi.

Thawngtla an tamtuk ruangah Covid-19 daan le dun khal an thlun thei lo ih damlo pawl thawn an ittlang thluh. Cuvek dinhmun a si ruangah July 21 zanah ralkap in thawngtla ṭhenkhat an suahsal ding thu an phuang.

Asinan tuiṭum ih an suah ding pawl cu ralkap in thuneihnak an lak hlan, February 1 hlan ih thawngtla pawl lawng an si ding. Cupawl cu ramkhel ruangih thawngtla an si lo ih, gambling, siivai ṭhalo tham le nawhcizuar pawl an si ding.

Thawngtla paziat an suah zalen ding ti cu an phuang hrih lo ih an suah ding mi pawl ih thuhla an zingzoi rero lai. Ziangtik ni ah an suah ding ti khal an phuang hrih lo.

Thawnginn kiltu officer in “Ziangtikah an suah zalen ding ti cu kan theifiang hrih lo. Ralkap in tu rori ah suah uh an ti asilen tu rori ah kan suah ding a si ko” tin Myanmar Now thuthang hnenah a sim thei.

Ahlan khalah ralkap in thawngtla tam zet an rak suah zalen zo ih, cutawk ahcun ramkhel ruangih thawngtla pawl khal an tel. Tuiṭum ahcun ramkhel ruangih thawngtla cu an suah zalen tum lo ti a si.

Mipi hruaitu lawyer Khin Maung Zaw in “Covid-19 an ṭih ngai asilen thawngtla zaten an suah zalen ding a si. Nawhcizuar le siivai ṭha lo tham pawl lawngin Covid-19 an kai lo, thawngtla zaten in an kai thei” a ti.

AAPP sungṭuan pakhat in “Ka zumdan ahcun ramkhel midang pawl kaih an tum ruangah thubuai dangih thawngtla pawl an suah zalen tum a si ding. Thawnginn hmunram an ti lawng duh ruangah a si ding” a ti. AAPP in thawnginn sungah ramkhel ruangih thawngtla 5,300 zat an um lai tin a ngankhum.

Be the first to comment

Leave a Reply

Your email address will not be published.


*