Thazang Nem (Miphun hlo ko tuah theitu)

Pu NoThan Kap: “Nuam lozet cingin, theih fiang awl dingah, miphun hmin ngan tel a si ding. Miphun pakhat hrangih mankhungbik “THUNEIHNAK” cu hnamdang kutah umter ringring dan a silo, hnamvai le hnamhlo ah can lantanak a si. Hloh ciocio ah hnamhlo si a pawibik, a rei vivo a sile a hmin men Miphun pakhat ah can lanta a theih.

Ziang kan tuah ding? In uk theinak ih an hman mi thazang phun 2: Thazang-hak (hard power) le Thazang-nem (soft power)- an 2 in doneh a thupi, a ṭul khal a ṭul. Thazang-hak (hard power) timi cu Hriamhrei kai Ralkap, Palik tipawl an si.

Thazang-nem (soft power) timi cu Hriamhrei hmang loin kan thinlung laksaktu dingih an hman mi an Zuknung, an Nunphung, an Political parties, an Ṭong le Calai, tipawl an si. Kan hrangah an Thazang-hak le Thazang-nem: 2 in ṭih a nung. Thazang-hak cun thinlung ah ṭihnak a umter ih mi a neh. Hmanseh, thinlung muril a la thei lo.

Khatlamah, thazang-nem cun ṭihnak si loin, dawikhu bangin thinlung kuaibetin a lak thei ruangah, a mi nehdan a nasa cuang, rei a daih fawn. Thazang-nem (soft power) thawn in neh hnuhnu cun thinlung muril tiang in ciahneh, in laksak thluh tinak a si, ṭih a nung tuk. Curuangah, An thazang-hak le thazang-nem a 2 in doneh lawlaw lawngah miphun pakhat sinak in dinsuak theih a si ding, ram le hnam a dam ding, zalennak par kan tlan thei ding.

Pakhat lawng, eg., an thazang hak lawng doneh khal a ṭha, asinan umzia a nei taktak lo. An pahnih in doneh a thupi, a ṭul khal a ṭul. Thangzang-hak doneh dan ziang vek a si? Thazang-hak cu thazang-hak lala hmangin dolet ih neh tum hi a larzet. Hmanseh, Thangzang-hak hi thazang-hak thawn dolet a sile, thisen, thlan le mitthli tampi a luan phah thei.

Thuneihnak timi cu mankhung tuk a si bangin, cumi lei ngah dingah neih mi nunnak mankhung tiang pek a ṭul ṭheu. Hizawnah, Kerang pawl cun kan Chin Ralkap hi a hram phawng ko nuai reh tum loin, cak taktak thei cuang siloin ret an tum ding. Hihi an ralreldan (strategy) pakhat a si.

Ziangahtile, Tlangmi in mai miphun ralkap a hranten kan neih thluh hi K.Ralkap in hlawknakah hman an tum sawn, an hmang rero. Tlangmi ralkap kan um lawngah K.Ralkap hrangah rampi paisa tampi an hman phah thei; Ralkap lubawk thawngza rual an neih a rem phah thei, lubawk rual an tam lawngah anmah hotu sumpai tiangih len phah rank tumpipi General rual an ret a rem phah thei.

Taktak ah Tlangmi ralkap (dolettu) um lo sehla K.Ralkap thawngzakhat (ting 1) neih hman a ṭul lo. Ting khat fang Ralkap um sehla sinak le hlawknak ngah ban General tampi tuvekin ret a ṭul lo ding. Cucu an duhmi a silo. Thazang-hak cu thazang-nem thawn doneh a theih lo maw? Theih e.. Eg., Leitlun uktu Mirang thazang-hakpi cu India ih Ghandi hoin thazang-nem thawn an doneh ih zalennak an ngah.Thazang-nem (soft power) doneh dan teh ziangvek a si?

Thazang-nem hi thinlung lam hnaṭuan a si ruangah, a hmangtu le a dotu hrangah awlzet a si, harzet khal a si, pitling khawruah neih a ṭul, hman thiamfe a ṭul fawn. Thazang-nem hmangtu lam zoh hmaisa sehla: Eg., Aungsan in, kan Chin zalennak ngah ding tanta in Burma rampi ah lut dingin Pinlung thukam ah in telter thei; a fanu ASSK khalin Chin party tanta in a party dinpi dingah in hiplut thei.

An pafa in, meithal zun khat puah lo, thazang-nem lawng hmangin kan thinlung in neh thei veve. #Tuini tiangin an hrangah thih ngam kan tampi. #Hihi thazang-nem hnaṭuan theidan le hmual neihzia langtertu a si. Thazang-nem doneh theidan: Chin in Thazang-nem kan hman dan ding thu ah, Eg., Hrilawk (election)ah, Bama party ihsin Chin pakhat hman MP cuhtu um lo, vote pek tik khalah an party vote petu um loin tuah a theih.

Hiruangah kaih le thawngthlak a theih lo. Meithal zun khat puah lo, thisen farkhat far loin, an tuah mi Dan (election law) lala hmangin neh neknek a theih. Hihi thinlung ih nehawk a si ruangah, an ṭihbik mi khal a si. Hitin nehnak co miin, Chinram hrangih tumtah mi ngah thei dingah hmual a nei zet thei (it can make tremendous impact on achieving our social and poltical demands). Eg., kan MP rualin Danpi tuahnak Hlutdaw ah, kan pupa leiram neihdan, kan nunphung kilhim le cawisan thu, zirnak school le college tiangin Chinca zir theidan, hloh rero zomi Chin ramri ngahsal ding thu .. tipawl aupi in a tak ram thlen a awl phah thei.

Himi hlawhtling zetin kan hman thiam a sile, himi hnakih sang sin (Federal hnakih sang) ngah ding tiangin Thazang-nem thotho hman a theih. A san cu, hnamdang uktu le an ukmi (kanmah) doawk cu “thinlung doawk (battle of hearts and minds)” a si. Hriamhrei le a dangdang cu thinlung ih hman mi “hmuh theih hmanrua” fang an si. A thupibik cu, “Thuneihnak” mankhunzia le thupitzia theih fiang hnuah, pupa ro Chinram tlunih thuneitu le laireltu sangbik cu kanmah lala kan si a ṭulzia theifiangin, a takin nunpi le ṭuan suakdan zir paih le hman thiam a si.

A tawinakin: Thazang-hak le Thazang-nem hmangin in ukbet kumkhua tumtu cu an hmanmi vek hmangin dolet thiam ding, tinak a si. Doletnak (revolution) timi ah,_ Hriamhreikai doletnak (armed revolution) a um, hriamhrei tel lo doletnak khal a um (There’s armed revolution and then there are other ways of revolution that do not involve armed resistance). A pahnih in kan hman thiam a thupi. Chinram tlunih zalennak le hnamdamnak cerlian Ninu suak cuan cuahco phahin…

Be the first to comment

Leave a Reply

Your email address will not be published.


*