Squid Game Zuknung A Nganmi Cu Kum 10 Sung Zohman In An Rak Cohlang Duh Lo, A Colhsan Zik Te

September 17, 2021 ah South Korea zuknung Squid Game cu an tlangzarh ih zarhthum sungah leiltun ih zuknung lar bik ah a cang. TV Series a si ih Season 1 sungah Episode 9 aum, mirang ṭong an hmang lo nan tulai leitlun zuknung khawvel ahcun a lar bik thotho.

Social Media tualrawn dangdang ah hmuh ding aum vivo ih game khalah an tuah rero zo. Asinan himi zuknung hi awlaiten an sersuak mi a si lo. 2008 kum ah Hwang Dong-Hyuk in himi zuknung tuah dingin ruatnak anei, 2009 kum ah a thuanthu fehdan ding cu a ngan thok.

A ngan theh hnuah zuknung tuahnak Studios dangdang ah a thuanthu nganmi cu a thehlut vivo nan zohman in an rak duh lo. Kum 10 sung a zuam rero nan an cohlang lo, zuknung sersuaktu Studios pawlin “A lem in a mak lo tuk” an rak ti san.

Cutin a beidong ruangah thuanthu ngan cu colhsan a tum, hringtu a nu le a pi a kilkhawi a ṭul ih sumpai a neih nawn lo ruangah a laptop khal zuar a tum. Cuvek dinhmun ih aum laitakah a thuanthu nganmi cu Netflix pawlin an rak hmu ih an cohlang thu an sim thei.

Hwang Dong-Hyuk in “Natsia ruangah leiltun mipi pawl kan thinhar thluh, boruak sia hlir in a khat. Tulai minung pawl ih kan dinhmun thawn a milawk ruangah Netflix pawlin an cohlang a si ding ti ka zum” a ti.

A zuknung thuanthu fehdan cu: Minung beidong, tlaksiatnak ih khat minung pawl cu company tumpi in a kokhawm ih game a lekter. A neh lo pawl cu an that hluahhlo, asinan a neh pawl cu sumpai tam zet an pe thung. Squid Game cu Hwang Dong-Hyuk in a ngan ih lem an cannak khalah amah in a karhruai thluh, Season 2-nak a tuah tum thu khal a rel.

Be the first to comment

Leave a Reply

Your email address will not be published.


*