Thih Ih Hlawknak: Dr. S. Ṭha Nei Fai

“Mitha an thi ih zohman in an theithiam lo, zianghman ah an siarlo. Asinan an thih tik ahcun a ra thleng dingmi thilthalo le retheih zonzaih an tuar nawnlonak hmunah an thleng (an cawl). Ziazatha a neimi pawl cu an thih tikah hnangamnak le colhhahdamnak an ngah a si” (Isai.57:1-2).

Minung ih raal tumbik le neta bik cu thihnak a si (I Kor.15:22). Zokhal ih kan huatbik, duhlo thlurthlo bikmi a si. Asinan thihnak hi Pathian ih thlentermi a si ih a thatzia zohman in an theithiamlo ih zianghman ah an siar fawnlo, Bible in a ti. A va dik em!

Zumtu thih ih hlawknak cu: (1) Sual ih huham natnak in an luat (Rom 6:7). Zokhal nat neilo kan umlo. Khirhkhan deuh tuar le tuarlo, phuntam deuh nei le neilo lawng kan si. Cucu siivai le sibawi ih an neh le nehlo a um.

Zohman in cuih kan tuarmi natnak khirhkhan le harnak in kan ruun aw theilo. Cuih natnak in Pathian in thihnak hmangin a mipawl a runsuak theu. Zumtu thi cu sualih huham natnak in an luat verver… Amen.

(2) Leitlun harnak a phunphun an suahsan (Isai.57:1): Kan hrangih thabik, dikbik le nuambik cu Bawipa lawnglawng in a thei ih in pe thei, in tuahsak thei. Mithapawl cu cuih harnak an tuar Bawipa’n a siang nawnlo ih an nunnak a laak sak.

(3) Retheih zonzaihnak in an cawl (Isai.57:2): Leitlun cu zing kan thawhin thinbangnak le beidonnak thusia hlasia lawnglawng kan thei. Innsang nunnak ding hawlin kan taksa a zonzai tuk, kan ram dinhmun phunphun ruatin kan thin a pit hluahhlo.

Cumi sungin Bawipa’n a mi, hrekkhat cu colhsan hai seh, a ti ih an nunnak a laksak. Hahdam takin an cawl hiahhiah. Helhkam an nei nawnlo, buaipi an nei nawnlo. Colh taktak in an cawl.

(4) Nuamsawn ram an thleng (Luka 16:22): Kan ram a hartuk ruangah mihrek cu ramnuam sawn ah an feh. Ramhar bik suahsan ih ramnuam sawn duhdawtmipawl an feh thei, an thlen thei tikah a pek ahcun kan tuar theilo, kan ngaithiam theilo. Asinan khua a rei cun a ziaum saal.

Kan duhdawtmi in leiharnak suahsan in leitlun ramnuam hmuahhmuah hnakih a let thawng tampi ih nuam “Vancung Ram” ah Bawipa’n a hruai. Kaa ih simthiam lo, thinlung ih ruah banlo ih cuih Ramnuam an thlen hi “lungawipi sawn ding” kan si.

Kan duhthusam vek hmanin kan duat theilo, kan cawm theilo, kan domkaih ban lomi Bawipa’n A mai zoh, enkawl, kilhim dingin a hnenah in hruaisak hai. Bawipa’n in sawng sawn a si.

Lazaras cu leitlun a damlai ahcun milian pai’ rawl tilfuan rori bawhin a sangka kiangah a va to. Uico in a hmaa an liahsak rero. Sinan a thih cun “Vancung Rawleinak Puai” ah vanmi in an hruai (Luka 16:22) a ti. Leitlun ih a phutban lomi a tong thlang.

(5) Vancung mi thawn an leengza (Heb.12:22): Dr. Billy Graham in zumtu cu kan pianthar ni thokin vancungmi pahnih ciarin in kil, a ti. Kan thihin kan taksa ruangpi sungin kan thlarau a suakih in kiltu vancungmi in Paradis ah an hruai. Cuihhmun ah vanmipi rualin hlarem mawi thawn an rak hmuak. Van siangpahrang fa rori kan sizia kan tep, kan ceen kumkhua thlang ding.. Hallelujah.

(6) Jesuh an tong, Immanuel in in umpi nan Pathian cu Thlarau a si ruangah mitin kan hmu theilo. Thlarau cu thlarau lawngin a hmu thei. Zumtu in kan thih lawnglawng ah in rundamtu Nunnem Jesuh a hmu thei. Kan duhdawtmi fehciapawl cun an hmu zo, an tong ngah zo.

Zumtu Khristian hmuahhmuah ih kan hngahhlap bik le ton kan hiarbik cu Tuufano Jesuh hmuh le ton ding hi a si. Zumtu thi hmaisasa in an hmu hmaisa, an tong hmaisa a si mai. A fehcia zumtu hmuahhmuah in leiram an manglo, leimi zohman an ngai fawnlo. Curuangah duhdawtmi unau “Mah ngailotu Ngai” kan bansan tum pei.

Mah duhlotu le ngailotu tlangval maw fala simaw ngai rero, kawh rero, ng asir rero, leen rero, thluun rero, hlam rero hi a bangthlak men, a aatthlak men lo sawm? Kanmah khal a reihlan ah kan feh kei kan tongaw ding paam si. Thih phanglo, har manglo, nat theilo riai in kan leengzaa ding. Amen, Amen, Amen

Be the first to comment

Leave a Reply

Your email address will not be published.


*