Thikthusia Ruangah A Nupi Lu Sat Tan

Cambodia, Phnom Penh khua ih um pacang kum 27 mi Phuong in thikthu siatnak ruangah a nupi kum 23 mi Ly Srey cu a that ih a lu a sat tan. Fapa kumkhat mi an nei, February thla ah nunhram thok dingin Cambodia khawpi Phnom Penh ah room sang in an khuasa.

Cutin hna an ṭuan ṭheu. Phuong in a nupi cu mipa dang na kop tin May 27 simlam ah a vel ciamco ih coka nam tumpi in a lu a sat tan. A nupi ih lu cu dip sungah a ret ih bike thawn an khua ah a tlung, a nupi ih lu cu lamlak ah a hlon.

An innhnen kum 48 mi Phan Sreyphet in an thamvang a theih ruangah an room sung ava bih ih thihnai lakih it mithi ruak lubul a hmu. Palik pawl a ko lohli, mithi ruak kiangah thihnai le sam kopmi nam khal an hmu. Palik pawlin inntek pa Phuong cu an hawl hngal ih May 28 sun ah an khua ah an va kai.

Phuong in a nupi a that thu a phuangaw ih “Ka nupi ih umdan a dik loin ka theih ruangah ka thikthu a sia tuk. Ka that hlan ahcun kut ka thlak dah lo. Coka nam in a lu ka sat tan” a ti. An innhnen pawlin Phuong in a nupi hi a hmuhsuam thei tuk, ringpin a ankhum ṭheu’ an ti.

“Phone ah mipa pawl na bia” tin a hro ṭheu. A thikthu sia tuk’ an ti. Palik bawi in, “Thinhennak le thikthu siatnak ruangah a nupi cu rapthlak zetin a that. A nupi a that thu khal a phuangaw zo, daan le dun vekin hremnak kan pe ding” a ti.

Thudang: Mizoram Ah Chinmi (2) rukru an kai
Mizoram, Saiha ah tualsung palik pawlin Chinmi rukru pahnih an kai. May 31, 2022 zinglam nazi 8:00 hrawngah an kai. An kaihmi pahnih cu kum 21 mi Salai Moses le kum 20 mi Salai Aung Thin Ann an si ih Chin State, Paletwa peng, Sami khuami an si.

Mithmutu in, “Lakphak dawr ah palik pawl an va lut ih lakphak an in laiah an kai. An kut an tawnbet ih motor sungah an lutter, ziangruangah an kai ti cu ka thei lo” a ti. Raltlan sakhan ih bike hi a hlo ṭheu ruangah rinhlel in mino pahnih cu an kai.

Thu an sutnak ah bike 6 ruktu an si ti an thei. KENBO 125 (5) le 135 bike (1) an ru zo ih bike (5) cu an rak zuarsuak zo. An kutsung ah bike pakhat an kai ngah ih tetti dingah an la. Saiha ramsung ah Kawlram mi raltlan a thawngtel in an um ih tualsung mipi le NGO pawlin an kilkhawi.

Be the first to comment

Leave a Reply

Your email address will not be published.


*