Thil Cang Thei (4): Pu No Than Kap

Pu No Than Kap: “Hmailam thilthleng ding thei thluh cia zohman an um lo. Curuangah tui dinhmun ah, Rampi ah cumi khami a thleng ding tin rel fukfi hnakin a cang thei (4) aum tiin thlir thiam hi a dik deuh ding.

(1) Khatlam in a dang khatlam cang thei nawn loin a neh thlep thlep dingih cutin buainak a cem thei.
(2) Nehtu taktak um loin reipi doaw rero thei. Tui dinhmun vek a si vivo le khatlam khatlam in bawmtu ramdang an um veve tikah nehaw lohli thei loin doawknak a sau vivo thei.

Cutin cemti nei loin a buai vivo asile Syria ram bangin Myanmar ram cu ṭhangso thei nawn loin a cau lanta thei, asilole uktu in mipi a uk thei nawn lo can (failed state) a thleng thei. Cuvek dinhmun in a feh rei vivo asile Failed state men hman silo Soviet Union le Yugoslavia rampawl bangin Rampi a pheldarh (disintegrate ) thluh thei.

(3) Tatmadaw cun rampi uknak mipi hnenah pesal dingin Rampi ah hrilawknak tuah (Hizawnah hrilawk theinak hmunah hrilnak tuah ih hrilawk tuah thei lo tiangih buainak hmun cu tanta hrih).

(4) Cabuai ah khat le khat remnak thu relin democracy danin hrilawknak neih hnuah hriltlin mi hnenah uknak pek ih Federal democracy dinsuak tum.

Federal democracy din hi a hleice in Tlangmi tam sawn duh mi le tumtah mi a si. Hmanseh, Tlangmi duhdan taktak cu “A hmin men Federal (quasi – federal) siloin Federal diktak (genuine federal) si thei dingah Tlangram pakhat cio in State 1 lawng kan neih bangin, Kawl khalin state (region) 7 si loin State 1 lawng nei ve seh” ti a si tikah, tui Kawl party 40 lenglo (NDF, NUP, NLD, USDP telin) le Ralkap tiangin an lungkim thei pei maw !!! .. ti hi thu harsazet a si.

Tutiang ahcun a hmin cun duh vek an bang nan a taktak a si lozia an langter rero zo ruangah, “Federal Democracy” le “Bangrep Nun (equality)” taktak cu “..A lang Tlangin mit cat zikin cuan cuahco hman ning, Lungduh nunnem na hmuihmel lang ti ni um lo..” tivek ah a cang thei. Curuangah, thil thleng thei 4 ah, a ṭhabik le a sebik a thlen khalle, kum 70 luan kan hmuh le kan tawn zomi lungfimten ruat phahin, timlamnak felfai le ṭha neih cia tluktu a um lo ding.

Be the first to comment

Leave a Reply

Your email address will not be published.


*