Jesuh A Thi Ih Nithum Hnuah A Thosal, Himi Ni 3 Sungah Khuiah A Feh Timi Thusutnak Cu A Lar Zet

Good Friday le Easter Sunday cu Christian pawlin kan ruat thupi zet. Thaisun April 17, 2022 ah Easter Sunday hmang ding kan si. Jesuh cu thinglamtah parah a thi ih nithum hnuah a thosal, himi ni 3 sungah Jesuh cu khuitawk hmun ah a feh timi thusutnak cu tulai ah a lar zet.

A letsawngnak cu Bible sungah fiang zetin aum lo ruangah zohman in an simfiang thei lo. Ṭhenkhat ih zumdan ahcun mithi khua ah ava feh ih Noah sanlai ih mithi pawl hnenah thuthangṭha ava sim, rundamnak thuthangṭha um hlan ih mithi pawl hnenah rundamnak thu ava sim an ti.

An lakmi Bible bungcang cu (1 Peter 3:18-20) “Ziangahtile Khrih cu minung sualnak ruangah kumkhua daih in a thi; nanmah Pathian hnenih hruaisuak dingah miṭhapa cu misual pawl ai ah a thi. A taksa in thihnak a tuar, sikhalsehla thlarau in nuntersal a si.

Cutiin thlarau in a nunsal ruangah thlarau thawngtla pawl hnenah a feh ih thu a sim. Hitiih thu a simmi thlarau pawl cu Noah ih lawng a rak tuah lai ah Pathian in thinsau in a hngak nain a thu a ngai duh lotu an si. Long sungih a lutmi cu mi malte, an zate in minung pariat lawng an si; annih cu ti sung ihsin runsuakmi an si”.

Hitawk zawngah thuruat ding tam zet aum, mithi khua ih um pawlin rundamnak an co theisal maw?. Rundamnak thuthangṭha aum hlan ih mithi thlarua in rundamnak an co theisal maw? Ṭhenkhat in Jesuh cu a thih veten Paradise ah a feh’ an ti.

An lakmi Bible bungcang cu (Luke 23:43), “Jesuh in cupa ih hnen ahcun, “Thu ka lo kam a si: Tuih sun ah keimah thawn Paradis ah na um ding,” tiah a ti. Mi tam sawn ih an zumdan ahcun a thih veten Pai hnenah a feh ti a si. Ziang asikhallen kan theihfiang theilo mi thuhla ahcun buai lo sehla a ṭhabik ding.

Kan theihfiang mi sawn, Jesuh cu kan sual aiah a thi ih nithum hnuah a thosal ti cu zum sehla Easter Sunday cu sunglawi zetin hmang ding kan si. (John 3:16) “Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi lo in kumkhua nunnak an co ding”.

Be the first to comment

Leave a Reply

Your email address will not be published.


*