Thinzar Wint Kyaw A Suah Theinak Dingah Ralhrang le SSPP An Bia Aw Rero Lai

Kum 34 mi Thinzar Wint Kyaw cu Shan State, Kyethi Township, Wan Hai ramsung ah ava feh ih documentary zuknung a tuah. Shan ramsung thangsonak ding hrangah documentary a tuah ih ramkhel thuhla zianghman aum lo tin SSPP in an phuang.

July 3 sun ah SSPP/ SSA ralbawi Lieutenant Colonel Sai Su ih fanu ṭhitumnak puai ah an sawm ih hnipuan khal thlengaw man loin ava tel. SSPP/ SSA ralkap kawr hruh in mopuai ah a tel ih a zuk cu online sungah a lar ciamco.

July 6 zinglam ah a tlung ih lamzin ah ralhrang pawlin an rak kai. Wan Hai le Lashio lamzin karlak ah an rak kai ih Lashio ah an hruai. Thinzar Wint Kyaw ceitu le mipa 4 khal an kaitel.

SSPP ṭuanvo neitu in, “Namlawng check gate ah an rak kai ih ralbawi in Lashio ah a hruai. Kan hnen a rat laiah hivek thil a tong ruangah kan buaipi rero lai. Nay Pyi Daw salkap ṭuanvo neitu pawl thawn an suah theinak dingah kan bia aw rero lai” a ti.

Hmun ṭhenkhat ah SSPP le ralhrang pawl an kap aw. SSPP hi ramkulh kahcawlhnak ahcun hmin an khen nan rampum huap kah cawlhnak NCA ahcun hmin an khen lo. Min Aung Hlaing ih sawm mi rampum huap ramdaihnak meeting ih tel ding hriamkai pawlkom 10 lakah an telve nan tuini tiang an tong aw hrih lo.

Be the first to comment

Leave a Reply

Your email address will not be published.


*