Thla 3 Hnu Lawngah A Innsang Pawlin Aumnak An Thei, A Fanu In “A Thi Lo Ti Zumnak Ka Rak Nei” A Ti

Mandalay, Maha Aungmyay Township ih um kum 50 mi Daw Pyone cu thla 3 zikte a thuhla theih a si lo hnuah Mandalay’s Obo Prison thawnginn sungah aum ti theih a si.

March 13 sunah Mandalay lamzawhtu pawl cu ralkap pawlin an kap ciamco ih an dum, Daw Pyone tei inn sungah lamzawhtu tam zet an va lut ih an relh. Cutin, lamzawhtu pawl arak humhim ruangah ralkap in a lu ah an kap, kiangkap um pawlin siizung ah an tlanpi.

Cumi hnu reilote ah ralkap pawlin an va la ih a thuthla cu theih a si nawn lo. A innsang pawlin ralkap sakhan, siizung le hmun dangdang ah an hawl rero nan an hmu lo, ralkap pawl khal an va sut ih kan thei lo an rak ti.

An innsung ih relh mino 5 khal ralkap pawlin an kai, ṭhenkhat cu an tlansuak thei. An ihkhun hnuai ih relh nunau pakhat in “Ka thiamaw lo tuk, an inn ih kan va relh ruangah harsatnak an tong phah” a ti. Himi sunah ralkap in minung 10 an that ih 20 hrawngin hliam nazet an tuar.

A fanu Tin Nilar San in “A tir ihsin a thi lo ding ti zumnak ka rak neicia” a ti. Thla 3 zikte hnuah ralbawi in a phone ih Pyin Oo Lwin Military Hospital ihsin Mandalay’s Obo Prison ah an thawn thu a sim.

Asinan, a innsang pawlin an va tong thei hrih lo, a lawyer in ‘A dam ṭha hrih lo, a lu khalah hliamhma a tuar lai nan siivai pek an siang lo. A kut le ke cu a zeng men thei” a ti. June 24, 2021 ah court hmaiah a lang ding.

Be the first to comment

Leave a Reply

Your email address will not be published.


*