Thluak Cakvaknak, Thluak Harhvang Na Duh Maw? Siar Aw

It Mai Awla Dik Ten Tho Aw: “Tuanten it, tuanten tho” ti hnakin “Caan dik ten rawl ei, it.” a si. Zaan lam tlaipi tiang meng le zing lam tho tlai pawl cu an thluak arak ritter. Cun zaan it tlai ih zingten tho khal hi thinlunglam, taksa lam tampi a siatsuah thei. Tuan ten it nain thawh tlai khal hi thluak ih hnaṭuannak a fungter. Tikcu caan vek ten kan it thei asilen ihhmuh kan khop ih, thinlung le taksa hrangah harhdamnak a si ih, thluak hrangah thilṭha zet a si.

Rualpi Thawn Lamleng Aw: Tlawng kainak ah siseh, hnaṭuannak ah siseh, zung kainak ah siseh, training kainak ah siseh rualpi pawl thawn feh aw. Rualpi pawl thawn vak ṭheu aw. Hitiih rualpi pawl thawn feh/vah tlangnak in pawlkomnak, nelawknak le thinlung lam khalah phurnak a suakter ih thluak a harhter/cakter.

Thluak Lehnak Tuah Aw: Thupolhnak le thluak ṭha le ṭha lo leknak games pawl lek aw. Olte ih tuahfel theih lomi cafang kom leknak, phone le computer sungih game pawl kha lek phahphah ṭheu aw. Hivekih leknak ruangah thluak thihri tete pawl hna a ṭuanter. Thil pakhat parah thinlung zate ṭhum theinak tha a cakter.

Daiten Caan Lak Aw: Mahte lawng daiten camkhat sung caan lak hi thil har cu a si lo. Mi ṭhenkhat in a har zetmi a si tin an ruat. Caan reipi to/tuah thei lo hmanah minit tawkfang hrawng tuah theih mi a si. Nitin tuah thei lo hmanah nihnih ah veikhat tal tuahnak in cinken theinak thluak a cakter.

A Ṭhami/Dammi Ei Aw: Kan in le ei mi tirawl hmuahhmuah lak ihsin zatek 20% cu thluak hrangah hna an ṭuan. Curuangah kan eimi tirawl pawl hi thluak hrangah a thupi tuk ti hi theih ringring a ṭha. Harhdamnak thawn a mil-aw mi tirawl einak in thluak a ṭhangsoter.

A Ṭha Lam Zawng In Thlir Aw: Ziangkim hi a ṭhalam zawng ih thlir thiam ding a ṭul. Thinharnak le ṭihnak pawl in thluak sungih Neuron pawl a thiter. Curuangah ziangtluk harsatnak le buainak tong hmanseh a ṭhalam zawng ih zoh/thlir thiam dingin zuam ding a si. A ṭhalam zawng ih thlir thiamnak in thluak ih thihri thar pawl cu a cakter sinsin ih, thinharnak le ṭihphannak pawl a hloter thei.

Hni Uar Aw: Hnih thei ding khal a ṭul. Hni tam pawl cu an nundam caan a sau timi thufim vekin hnihnak in ruangrai (taksa), thinlung lam natnak pawl a ṭumter thei. Nuam zet ih um huahho thei pawl le hni hluahhlo thei pawl hi thinharnak an nei mal deuh ngaingai. Curuangah capo zuknung film pawl zohnak, capo tuah tivek pawl hi thluak sungih endorphin-level a ṭhangsoter.

Awnmawi Ngai Aw: Awnmawi (hla) ngainak in thinlung lam le cinken theinak thluak ih thil ti theinak pawl a cangvaiter. Ruahnak thar khal a suak thei, a danglam zet mi ruahnak phunphun a suahpi. Curuangah awnmawi (hla) ngainak in thluak ih vorh lam a cakter.

Mahte Thei Dingin Tuah Aw: Self-Hypnosis timi cu mai’ thinlung thup ih thei dingih tuah ti let sehla a nai bik ding. Thuṭhimnak ah: Thla cem ni ah thil pakhat tuah ding a um ti bang sehla. Cuih ni a thlen tikah hngilh loten tuah thei. Cun zinglam nazi 6:00am ah thawh ding asile ALERM tello in nazi 6:00am ah tho thei dingin mahte ih zuam khi a si.

Thawh ding tikcu hngilh lo ten ihthah thei khi a si. Hmailam ih tuah/ṭuan dingmi pawl ti ṭhepṭhep ummi pawl pelh lo ten tuah/ṭuansuak tla a si. Cutiih thluak in cinken theinak a neih theinak dingih tuahnak in khawruahnak tampi a fimter/kauter.

Hmuitinmi Nei Aw: Hmuitinmi/tumtahmi nei tengteng ding. Thlaruk sungah ziangmi ka tuah ding, kumkhat sungah ziang mi tumtahnak nei in hna ka ṭuan ding tivekin tumtahnak pakhat tal ret in zuam ding a si. Hmuitin/tumtahnak neih lonak in thluak ih thuruah theinak thazang a ṭumsukter. Asinan tumtahmi neitu pawl ih thluak cu a ṭhangso vivo, cutin a netnak ahcun hlawhtlinnak a suahpi.

It Mai Awla Dik Ten Tho Aw: “Tuanten it, tuanten tho” ti hnakin “Caan dik ten rawl ei, it.” a si. Zaan lam tlaipi tiang meng le zing lam tho tlai pawl cu an thluak arak ritter. Cun zaan it tlai ih zingten tho khal hi thinlunglam, taksa lam tampi a siatsuah thei. Tuan ten it nain thawh tlai khal hi thluak ih hnaṭuannak a fungter. Tikcu caan vek ten kan it thei asilen ihhmuh kan khop ih, thinlung le taksa hrangah harhdamnak a si ih, thluak hrangah thilṭha zet a si.

A tlunih tarlangmi pawl hi kan tuah thei asile duh vekin kan thluk a ṭhat lo hmanah kan kiangkap le rualpi lakah cun mi pitling pakhat cu kan si hrimhrim ding. Cun himi a thlun theitu pawl hi an thluak a cak, harsatnak khal neh theinak lamzin an hmu thei deuh ngaingai tin zingzoitu pawl in an sim. (Lairawn Meifar)

Be the first to comment

Leave a Reply

Your email address will not be published.


*