Thu An Sut Ih An Hremnak Ah A Ke Tin An Dirsuak

Myanmar Filmmaker hminthang Ma Ein cu June 5 sun ah Yangon a inn ihsin a suah zawngah ralkap pawlin an rak kai. An kaihnak hi thlakhat a kim zikte thlang nan ziangruangah an kai ti an thei hrih lo.

Aumnak thawnginn ihsin suak pakhat in “Ma Ein cu an hrem nasa tuk, thu an sut ih an hremnak ah a ke tin zaten an dirsuak thluh. A taksa dang khalah hliamhma nasa zet a tuar ruangah siizung ah ni 10 sung an tuamhlawm. Tu’ahcun a ṭha zo, siizung ihsin a suak zo ih ralkap thusutnak hmun ah aumsal zo” a ti.

Tutiang an suah hrih lo ih a innsang pawl khalin an pehtlaih thei hrih lo ruangah an seherh tuk. Burmese Women’s Union, Daw Tin Tin Nyo in “Ralkap pawlin rampi daan an pahbal. Ma Ein cu sualnak nei ih an kaihmi a si lo, rinhlel thu ih kaihmi a si ruangah thu cu an sut thei nan hrem theinak an nei lo” a ti.

Ma Ein cu Myanmar Filmmaker hminthang a si ih zuknung thuhla ah ramdang dang ah arak feh ṭheu. Ralkap in Myanmar ramsung thuneihnak an lak hnu June 28 tiangah minung 883 zat an that zo, sualnak neilo minung 6399 zat an kai ih 1966 zat cu an suahsal.

Sualnak neilo minung 5202 zat an kai lai tin zingzoitu pawlkom AAPP in an phuang. Thawnginn ihsin suak pawlin an mi hremdan rapthlak cu an phuangsuak, rawl khal khopkhamten an pe dah lo. Nunau pawl cu mipa-nunau sinak lam khalin an phuahcok ṭheu tin an phuang.

Be the first to comment

Leave a Reply

Your email address will not be published.


*