Thurban Pumhnih Ru Ih Eitu Cu An Vel That

Shan State, Hsi Hseng Township, Bangyue Kyaungche khua ah thurban pumhnih ru ih eitu cu tualsung mipi pawlin an kai ih an vel ciamconak ah a nunnak liam. Kum 26 mi mipa hi lamzin kap ah bursia hawl ṭheu a si, an khuasung ah thil a hlo ṭheu ruangah bursia hawltu cu rukru ah an ruat.

June 14 sun ah thurban hmuan sungah a lut ih thurban pumhnih a ru ih a kiangkap ah a ei, khuasung mipi pawlin an va hmu ih an vuak, an vel ciamco.

Khuami pakhat in, “Bangyue Kyaungche khua ah thil a hlo ṭheu. A feh ṭheunak phugyi tlawnginn khalah thil a hlo ruangah thil rutu cu amah si ding an ti. Mi ṭhenkhat in an zohthup ih thurban a ru ih a ei lai an va hmu, miburpi in an vel ciamco ih a thi” a ti.

Khuasung mipi pawlin an velh ciamco hnuah a thi hngal lo, inn ah ava tlung ih an inn ah a hliamhma tuar nawn loin a thi. Tualsung mi pakhat in, “An velh hnuah a thi hngal lo, bike khal a mawng thei lai. Inn a thleng hnuah a hliamhma tuar a nasa tuk ruangah a thi.

A nu cu bazar ah arak um, a fapa thuhla a theih veten a tlan tlung. Inn ava thleng tikah cun a fapa cu arak thi zo” a ti. Khuami pakhat in, “Thurban pumhnih a ru ih a ei ruangah an vel that cu a poi tuk. An kai asilen ṭhaten thusut hmaisa ding an si.

Miburpi ih velh ding a si lo, thurban pumhnih ruangah minung nunnak a liam cu thilṭha lo zet a si” a ti. Ralhrang in ramsung thuneihnak an lak hnuah ramsung ah rukru an tam zet. Rukru pawl cu cozah in an buaipi lo ruangah tualsung mipi pawlin anmahten thu an ṭhencat ṭheu.

Be the first to comment

Leave a Reply

Your email address will not be published.


*